Operacion i gjerë i SPAK, rreth 20 masa sigurie për Inceneratorin e Tiranës; në “rrjetë” edhe përfaqësues të medias

Operacioni është duke vijuar dhe lidhet me kompani guacka të lidhura me Inceneratorin e Tiranës.

Prokuroria e Posaçme ka ndërmarrë një operacion të gjerë mbrëmjen e sotme. Mësohet se janë lëshuar afro 20 masa sigurie për aferën me Inceneratorin e Tiranës.
GJKKO ka pranuar kërkesën e SPAK duke vënë nën masa sigurie “arrest në burg” dhe “arrest në shtëpi” disa zyrtarë, si dhe përfaqësues të medias.
Një pjesë e masave të sigurisë janë persona që tashmë janë të arrestuar ose e kanë një masë sigurie nga hetimet e mëparshme.
Operacioni është duke vijuar dhe lidhet me kompani guacka të lidhura me Inceneratorin e Tiranës. Pra në rrjetë kanë rënë edhe biznesmenë, teksa dyshohet për zyrtarë të Bashkisë së Tiranës dhe qeverisë. Po ashtu mësohet se janë 2 emra të lidhur me median.
Nesër pritet një deklaratë zyrtare nga SPAK për të hedhur dritë. Duhet theksuar se javët e fundit në SPAK u morën në pyetje mbi incenratorin e Tiranës disa emra të rëndësishëm si Erion Veliaj, Belinda Balluku, Engjëll Agaci dhe Emiriana Sako.
Aktualisht lidhur me inceneratorët janë në qeli ish-ministri, Lefter Koka dhe ish-deputeti, Alqi Bllako. 
Ndërkohë absurdi është se bosët e inceneratorëve janë ende në arrati. Edhe pse janë dënuar me vendim nga gjykata, ata nuk dihet se nga bredhin me paratë e qytetarëve.

Dënimet për inceneratorin e Fierit

Gjykata e Posaçme dënoi me 10 vjet heqje lirie ish-ministrin e Mjedisit, Lefter Koka për dosjen e inceneratorit të Fierit, por ai përfiton zbritje në 6 vjet e 8 muaj nga gjykimi i shkurtuar.
Dënimi u lehtësua në 2 vjet e 8 muaj heqje lirie për Alqi Bllakon, si pasojë e ndryshimit të akuzës. Për të SPAK kishte kërkuar 7 vjet burg ose 4 vjet e 8 muaj, por ish-sekretari i përgjithshëm i Ministrisë së Mjedisit, mori pafajësi për akuzën “shpërdorim detyre të funksionarit të lartë shtetëror”, dhe vepra penale iu rikualifikua në “shpërdorim detyre të nëpunësit që kryen detyrë publike”.
Biznesmeni Klodian Zoto u shpall fajtor për akuzën “Korrupsioni aktiv i funksionarëve të lartë shtetërore ose i të zgjedhurve vendorë” dhe mori pafajësi për akuzën, “Korrupsioni aktiv i personave që ushtrojnë funksione publike”. Ai u dënua me 12 vjet burg, i cilësuar fajtor edhe për “skema mashtruese me TVSH-në” dhe “pastrim parash”, duke përfituar zbritje në 8 vjet nga gjykimi i shkurtuar.
Ish-administratori i incineratorit të Fierit, Loran Dusha u shpall i pafajshëm për “korrupsion aktiv”, por fajtor për “pastrim parash” dhe u dënua me 7 vjet burg, duke përfituar zbritjen në 4 vjet e 8 muaj nga gjykimi i shkurtuar.
I njëjti dënim me 7 vjet burg, të zbritura në 4 vjet e 8 muaj heqje lirie u dha edhe për Arbër Denizin, i cili akuzohej për çështjen e punimeve në incineratorin e Fierit. Ish-drejtori i ministrisë së Mjedisit Pellumb Abeshi, u dënua me 3 vite e 6 muaj burg, por me gjyq të shkurtuar përfitoi zbritjen në 2 vjet e 4 muaj burg, të cilat në fund u konvertuan në shërbim prove.
Dy të pandehurit Florian Muçaj dhe Azem Shatëri, u dënuan me nga 3 vite burg, por përfituan zbritje në dy vjet me gjyq të shkurtuar dhe u lanë të lirë, për shkak se e kanë kryer dënimin me paraburgim. Erjon Murataj, ish-anëtar i Komisionit të Prokurimit u dënua me 3 vite burg, dhe përfitoi uljen në dy vjet me gjyq të shkurtuar. Të akuzuarit e tjerë, Regan Merdani dhe Gentian Zifla u dënuan me 3 vite burg, të cilat u pezulluan për t’u konvertuar në shërbim prove.
E pandehura Sabina Cenameri mori një dënim me 3 vite burg, por u la në shërbim prove, pasi ka një fëmijë të mitur. Zv.presidenti i FSHF-së, Arben Dervishaj, i akuzuar në cilësinë e supervizorit të punimeve në inceneratorin e Fierit, mori pafajësi për akuzat falsifikim dokumentesh dhe korrupsion.

Dënimet për inceneratorin e Elbasanit

Gjykata e Posaçme për incenratorin e Elbasanit dënoi ish-ministrin e Mjedisit, Lefter Koka me 5 vjet e 8 muaj burg për korrupsion e shpërdorim detyre.
Ish-deputeti Alqi Bllako mori pafajësi.
Biznesmeni Klodian Zoto, u deklarua fajtor dhe u dënua me 10 vite burg, por me gjykimtë shkurtuar përfitoi zbritjen në 6.8 vjet heqje lirie. Të njëjtën masë dënimi gjykata dha edhe ndaj biznesmenit tjetër Mirel Mërtiti. Ndërkohë, Stela Gugallja, administratore në inceneratorin e Elbasanit, u dënua me 7 vjet heqje lirie, por me gjykim të shkurtuar përfitoi zbritjen në 4.8 vjet.
Me 4 vjet burg u dënua Pëllumb Abeshi, ish-kryetar i Komisionit të Shpronësimit, por me gjykim të shkurtuar do të vuajë 2.8 vjet, ndërsa për anëtarin e komisionit, Bardhyl Cabiri, GJKKO vulosi dënimin me 2 vjet burg dhe anëtaren, Jonida Zeqo 4 vjet, por me gjykim të shkurtuar do të vuajë 2.8 vjet burg. 1.4 vite do të vuajë edhe ish-anëtari tjetër i komisionit, Serafin Papa, teksa i shuhet masa e sigurisë “arrest në shtëpi”, pasi ka përfunduar koha e dënimit gjatë qëndrimit. /Pamfleti 
Burimi