Lirimi i Berishës dhe dosja e bandës së Suel Çelës, Bushati: Ne bëjmë drejtësi për spektakël, jo për të gjetur të drejtën

Gazetari Andi Bushati thotë se pas lirimit të liderit të opozitës, kjo e fundit duhet t’i bëjë vetes pyetjen se çfarë drejtësie kemi në Shqipëri.
Bushati tha se përvoja ka treguar se sa herë opozitës i jepet diçka, i merret një gjë tjetër më e madhe më pas.
“Është një vendim që vjen në një moment që partitë e djathta europiane folën për një narkokraci shqiptare që po burgos opozitën. Di që ka shumë të gëzuar për këtë ngjarje. Por në vend që të ekzaltohen, duhet ti ngrenë vetes pyetjen: çfarë lloj drejtësie kemi që mban liderin e opozitës të mbyllur për gati një vit. Për standarde nuk mund të flitet sepse ato do të ishin në rastin kur parlamenti do të shprehej nëse atij i kufizohet apo jo liria pa votuar kolegët e tij. Që këtu, standardi u shkallmua.
Gjithnjë e më shumë po ngrihet pyetja mos SPAK dhe drejtësia e re, Gjykata Kushtetuese, nëse këto janë masa për të goditur opozitën nga pozita. Duhet të jemi koshientë që në dy vitet e fundit, opozitës në betejat me drejtësinë i është dhënë diçka por i është marrë diçka tjetër. Siç ndodhi me vulën, që vërtet ia dhanë, por i burgosën liderin.
Opozita nuk përfiton asgjë nga dalja e Berishës sepse me vula apo pa vulë, me lider të izoluar apo pa lider të izoluar, opozitës i shkelen të drejtat. Drejtësia nuk funksionon në një pikë. Ajo akoma ruan të pandëshkueshëm grabitësit e zgjedhjeve. Ka prekur vetëm Belerin deri tani. Në këtë kuptim, gara do të jetë e pabarabartë”, tha ai për “MCNTv”.
Duke u ndalur te rasti i dy gazetarëve të përfshirë në hetimet për organizatën e Suel Çelës, Bushati tha se emrat e tyre u bënë publikë thjesht për të tërhequr vëmendjen. 
“Për të gjitha e dimë që ka policë, avokatë, gjyqtarë e gazetarë. Dyshohet se ka politikanë. Politikanët ne nuk i dimë. E dimë që këta kanë vjedhur vota për PS. Por nuk shohim përfituesit. Kjo lidhet me atë që thashë: gara është e pabarabartë. Tani po tentohet të hetohen hajdutët e votave, po banditët që bëjnë punën në terren, jo përfituesit. Ne bëjmë drejtësi për spektakël, por jo për të gjetur të drejtën.
Mua më duket se çështja Qyno dhe çështja Hoxha para se të jetë çështje penale, është një çështje morale, pra është çështje që e kanë me publikun, emisionet e darkës, por jo me SPAK-un.
E zëmë se mua më paguan dikush për të thënë gënjeshtra. A është kjo një vepër që duhet ta trajtojë SPAK-u. Nuk dua të amnistoj njeri. Ata e kanë përdhosur profesionin tonë. A duhej SPAK-u të merrej me këta gazetarë? Në një vend ku vidhet vota, pasuria publike, a duhet të merret SPAK me një gazetar që gënjen. Në një dosje ku nuk ka politikan, emrat e gazetarëve u hidhen turmave për të nxitur urrejtje, duke fshehur pas zhurmës emrat e politikanëve. Banda e Sule Çelës ka bërë vota për PS. Kryetar i qarkut ishte Taulant Balla. Por unë dyshoj se SPAK-u do të shkojë deri te ai. Fakti është që Balla kë përfituar nga krimi elektoral i Çelajve”, shtoi ai.
Burimi