Zbardhet dëshmia e Marklen Hakës për vrasjen e Gentjan Bejtjas: Bleva fidanë lulesh për t’i mbjellë dhe ika në shtëpi
Marklen Haka
TIRANË- Marklen Haka alias Aliu, rezulton të jetë njëri nga 8 personat e marrë në pyetje lidhur me vrasjen e Gentjan Bejtjas në 15 Mars në banesën e tij në Larushk. Gazetari Elton Qyno raporton për OraNews së në dëshminë e tij lidhur me ekzekutimin e Gentjan Bejtjas, Marklen Haka tregon lëvizjet që ka bërë para vrasjes së tij.
Ai ka rrëfyer se para se të vritej Genti, ai së bashku me një shok dhe kushëririn e tij, ka udhëtuar me makinë së deri në fshatin Buran, të njësisë Nikël, ku ka blerë disa fidanë lulesh për ti mbjellë në oborr.
Pas kësaj deri në momentin kur është shoqëruar në polici, Haka thotë se ka qëndruar në banesë dhe se lajmin për vrasjen e ka mësuar nga policia.
“…në lidhje me ngjarjen dua të shpjegoj se nuk kam dijeni dhe jam informuar për vrasjen e Gentjan Bejtjas vetëm në momentin e kontrollit në banesë nga policia…” – ka deklaruar Haka.
Policia e ka pyetur Marklen Hakën nëse kishte njohje me viktimën, dhe ai është shprehur: Si banor të zonës prej vitesh.
“…por që nga viti 2019 nuk jam takuar me të. Takimi i fundit ka qenë një vizitë në banesën time, ku Gentian Bejtja disa ditë pas plagosjes ka ardhur për ngushëllim në muajin shtator 2019…” – ka treguar Marklen Haka.
Për këtë ngjarje në pyetje është marrë dhe Gazmir Saka një personazh i akuzuar për një seri vjedhjes me armë në zonën e Krujës, por ai ka deklaruar se ishte në shtëpi, pasi s’mund të lëvizte duke qenë se ishte në masën e sigurimit “arrest në shtëpi”.
Krimi i rëndë ndodhi në sy të fëmijëve të Bejtjas, teksa ky i fundit ndodhej brenda një sere të vogël, duke vaditur domate. Për këtë ngjarje janë vënë në pranga dy persona: Ilir Beqaraj alias Brahimi, kunati i Roan Brahimit dhe Edison Haxhiu. Ndërsa në kërkim është shpallur dhe një person nga Vlora, Flodian Plaku./ZËRI
