“Nuk ishim as të dehur e as të droguar”/ E dashura e italianit që vdiq në Velipojë: Policia e Shqipërisë dha version të gabuar

Nicola Iorio dhe Giusy Di Tella

ITALI- Një aksident tragjik i regjistruar të dielën që kaloi në plazhin e Velipojës mes dy jet-skive i mori jetën 19-vjeçarit italian, Nicola Iorio. Policia njoftoi se shkak i aksidentit në ujë, u bënë manovrat e gabuara të dy të rinjëve, pasi ishin në gjendje të dehur, por e dashura e të ndjerit pretendon të kundërtën. Giusy Di Tella, njëkohësisht dhe motra e të arrestuarit, Salvatore Di Tella thekson se ata nuk ishin as nën efektin e alkoolit dhe as të ndonjë droge. Sipas saj në Shqipëri duan gjithmonë të gjejnë një fajtor, por në rastin e të afërmve të saj, ajo sqaron me detaje se nuk ishin larg bregut dhe ishte thjesht një aksident tragjik.
“Autoritetet shqiptare kanë lëshuar trupin e të dashurit tim dhe po përgatitemi për t’u rikthyer në Itali, por dua të theksoj fort se ishte thjesht një aksident tragjik, një përplasje e papritur. Ne nuk kishim pirë as alkool e as drogë. Unë, i fejuari im dhe vëllai im kemi qenë gjithmonë shumë të lidhur bashkë. Dy jet ski-të ishin larg njëra-tjetrës dhe ne nuk ishim aq larg bregut, ndryshe siç raportohet. Unë po xhiroja një video me celularin tim, kur Nicola më tha ta fikja. Në atë moment, pati një përplasje në anën e djathtë të jet ski-së tonë. Vëllai im u hodh menjëherë në det për ta shpëtuar Nicolan dhe e nxori trupin e tij në breg, që më pas u transportua drejt spitalit, aty ku nuk arriti të mbijetonte. Por dua të ritheksoj se ishte thjesht një aksident tragjik. Vëllai im nuk kishte asnjë faj, madje edhe familja e të dashurit tim thotë pikërisht këtë. Por këtu, në Shqipëri, ata domosdoshmërisht duan të gjejnë një fajtor: kjo është arsyeja pse ne kërkojmë ndihmë nga autoritetet italiane”, thotë si fillim Giusy, raportojnë mediat italiane.

Nicola Iorio erdhi me pushime në Shqipëri së bashku me shokun e tij, 20 vjeç. Të dy u përplasën me mjete lundruese, ku 19 vjeçari u plagos në kokë dhe në qafë. Menjëherë ai u dërgua në spital, por nuk arriti t’i shpëtonte plagëve të marra. /ZËRI
Burimi