Atentati ndaj Altin Halilit, merren në pyetje familjarët e Sokol Kaloshit, i vrarë në 97-tën. Dëshmia: Tentova t’i përplasja me makinë

Makina e autoreve

BERAT- Detaje të reja kanë dalë në dritë nga atentati i ndodhur pasditen e djeshme në Berat, ku objektiv ishte shtetasi Altin Halili. Burime bëjnë me dije për ZËRI-n se policia ka marrë në pyetje vëllanë dhe nipërit e Sokol Kaloshit, i vrarë nga Altin Halili në trazirat e vitit 1997. Për këtë vrasje, Halili vuajti një dënim me 12 vite burg, dhe që prej lirimit nga qelia në vitin 2010, nuk kishte ardhur më në Shqipëri. Halili prej 14 vitesh ndodhej në Itali, dhe vetëm këtë verë ishte rikthyer në vendlindje, ku dhe u përball me pritën e armatosurit.
Anëtarët e fisit Kaloshi, pasi janë marrë në pyetje, janë lënë të lirë, pasi nuk ka pasur prova për implikimin e tyre në ngjarje. Atentati ndaj Altin Halilit, ndodhi pasditen e djeshme në rrugën e fshatit Dyshnik. Atentatorët, që lëviznin me një automjet Hunday Tuscon, nuk kanë mundur dot as ta plagosin shënjestrën e tyre, edhe pse kanë gjuajtur disa herë me kallashnikov drejt tij.
Plumbat kanë prekur vetëm makinën e 46-vjeçarit, duke bërë “shoshë” xhamin e pasmë dhe sediljen e pasme të mjetit. Pas këtij atentati, Altin Halili ka dëshmuar në Policinë e Beratit, duke hedhur dyshimet se autorët janë nga fisi i Kaloshëve, të zonës së Gradishtës, pjesë e bashkisë Divjakë.

Halili ka deklaruar se ai nuk ka pasur asnjë konflikt me persona të tjerë dhe se për vrasjen e kryer ka paguar me burg. Përpara grupit hetimor 46-vjeçari ka deklaruar se atentati i është bërë në shenjë hakmarrjeje për vrasjen e bërë në vitin 1997.
Halili ka deklaruar në Policinë e Beratit se ai po kalonte përpara një shkolle private në Berat, ku në atë lagje do të takonte një mik dhe ka parë 3 persona të maskuar që i kishin zënë pritë. Pasi i ka parë, Halili ka shtuar shpejtësinë e mjetit dhe ka dashur t’i godasë me makinë por nuk ka mundur pasi ata kanë filluar ta gjuajnë me breshëri kallashnikovin.
Halili ka deklaruar se është ulur poshtë sediljes dhe pasi ka dëgjuar makinën që ka ikur me shpejtësi, ka lëvizur. Sipas tij, atentatorët janë larguar duke menduar se e kishin vrarë. Sipas Policisë, atentatorët e kanë qëlluar në ecje me automatik Skorpion dhe gëzhojat i kanë mbledhur, pasi nuk kanë zbritur fare nga makina.
Altin Halili është qëlluar me 10 plumba, të cilët kapën pjesën e pasme të makinës së tij. Më pas, rreth 20 km nga vendngjarja, autorët dogjën në fshatin Kozare në qytetin e Kuçovës, makinën e tyre, tip Hunday Tuscon.
Ndërkohë që grupi hetimor po vazhdon të punojë për zbardhjen e ngjarjes, strukturat e DVP Fier e Berat nuk kanë arritur ende të kapin deri më tani autorët e atentatit, pavarësisht postblloqeve të shumta, të ngritura në çdo hyrje-dalje qyteti e fshati në Berat, Lushnje, Kuçovë e Fier.
Shënjestra e atentatit, Altin Halili është dënuar për vrasjen e Sokol Kaloshit, vrasje e kryer në vitin 1997. Altin Halili u dënua 15-vjet burgim dhe ka dalë nga burgu në vitin 2010.Pas daljes nga burgu, Halili u largua në Itali, nga ku ishte kthyer vetëm pak kohë më parë.
Burimi