Arrestet kardiake në plazhe, mjekja e Spitalit të Durrësit zbulon faktorët me rrezik të lartë: Ndryshimi i temperaturës dhe…
Një 70-vjeçar nga Tirana humbi jetën në plazhin e Durrësit pasi pësoi arrest kardiak sapo u fut në det. Pushuesit e tjerë u përpoqën t’i japin ndihmën e parë duke thirrur shërbimin e urgjencës, por pa sukses.
Sipas mjekëve, mosha dhe sëmundjet kronike janë faktorë me rrezik të lartë për ngjarje me pasoja për jetën edhe kur jeni me pushime.
Aurora Rapaj, mjeke urgjence e Spitalit të Durrësit thotë: “Pacientët që janë moshë e madhe e kanë riskun shumë të madh për sa kohë futen në det pasi qëndrojnë për një kohë të gjatë në diell. Janë pacientë hipertensiv, me probleme të arterieve koronare, prandaj këshillojmë të mos futen direkt në ujë sepse ndryshimi i temperaturës nuk përballohet dot nga zemra që ka probleme kardiake. Bëjnë aritmi dhe më pas arrest. Edhe sot patëm një 70-vjeçar që kishte qëndruar 3 orë në diell dhe njihej si hipertensiv dhe diabetik. Tek ne erdhi pa shenja jete.”
Por jo gjithmonë faktori moshë është vendimtar.
Këtë sezon 6 pushues kanë humbur jetën nga arresti kardiak në plazhet e Velipojës, Durrësit dhe Spillesë, mes tyre dhe një 22-vjeccar që u fut të lahej në lumë.
“Moshat e reja janë raste të rralla. Janë pacientë që nuk janë ndjekur dhe s’kanë kryer vizita mjekësore dhe tek këto mosha mendohet kryesisht që janë probleme të lindura kardiake, të padiagnostikuara më parë”, shton mjekja.
Ky 86-vjeccar nga Kosova e shijon çdo verë plazhin e Durrësit, por di të jetë dhe i kujdesshëm teksa futet në det nën kujdesin e të birit.
Një pjesë e mirë e pushuesve nuk ka njohuri mbi reagimin në çastet e para kur përballen me situata emergjente, por njoftimi i urgjencës nuk është i vetmi, pasi deri në mbërritjen e saj mund të jetë vonë.
E ndërsa hetimet për humbjet e jetëve vazhdojnë për të kuptuar më mirë shkaqet dhe rrethanat e këtyre fatkeqësive në zonat e pushimit, mjekët apelojnë për kujdes të shtuar në plazhe.
Top Channel
Burimi
