Kandidoi brenda demokratëve për presidende, Gabbard i bashkohet Trump: Demokratët janë marrë nën kontroll të plotë nga liberalizmi burracak

Ish-kandidatja presidenciale demokrate, Tulsi Gabbard, ka mbështetur Donald Trump-in në garën për Shtëpinë e Bardhë, duke njoftuar se ajo i është bashkuar Partisë Republikane.
Gabbard, 43 vjeçe, shërbeu si kongresiste demokrate nga Hawaii dhe kandidoi për nominimin presidencial të partisë në vitin 2020. Dikur me misione në Irak dhe Kuvajt, ajo u bë një kritike e ashpër e ndërhyrjeve ushtarake të SHBA-së jashtë vendit. Gabbard u largua nga demokratët në vitin 2022, duke e akuzuar partinë se ishte “nën kontrollin e plotë të një grupi elitar luftënxitësish të shtyrë nga liberalizmi burracak”.
Ajo bëri një paraqitje befasuese në mitingun e Trump-it në shtetin kyç të Karolinës së Veriut të martën, ku kandidati republikan e prezantoi atë si një person me “shumë mendim praktik”. Pasi mori fjalën dhe përqafoi Trump-in, Gabbard sulmoi Partinë Demokratike, e cila tha se është bërë “e panjohshme” vitet e fundit.
Demokratët tani janë “kundër lirisë, pro censurës, pro kufijve të hapur dhe pro luftës”, pohoi Gabbard, duke shtuar se Trump-i “u zotua t’u japë fund luftërave, jo t’i fillojë ato. ”
Gabbard argumentoi se lidershipi i Trump-it ka ndihmuar “të transformojë Partinë Republikane dhe ta kthejë atë në partinë e popullit dhe partinë e paqes”. “Jam krenar që qëndroj këtu me ju sot, presidenti Trump, dhe të njoftoj se po bashkohem me Partinë Republikane. Unë po i bashkohem partisë së popullit… Është partia e mendimit praktik dhe partia që udhëhiqet nga një president që ka guximin dhe forcën për të luftuar për paqen.”
Ish-demokratja ka qenë një kritike e zëshme e karrierës së Harrisit si prokurore dhe e politikës së saj të jashtme, veçanërisht për konfliktin në Ukrainë. Gabbard e kritikoi kandidaten demokrate si “nxitësen kryesore” të armiqësive, duke sugjeruar se ajo kapërceu vijën e kuqe të Rusisë duke mbrojtur pranimin eventual të Kievit në NATO.
“Për çdo person me logjikë, e shihni pse ata nuk do të donin që raketat e NATO-s të ishin në Ukrainë… Kamala Harris na ka vënë ne, popullin amerikan, në këtë pozicion, ku jemi më afër pragut të Luftës së Tretë Botërore dhe luftës bërthamore se kurrë më parë”, tha ajo.
Pozicioni i Gabbard-it është në përputhje me atë të Trump-it, i cili ka bërë thirrje në mënyrë të përsëritur për një armëpushim ndërsa është zotuar për t’i dhënë fund armiqësive mes Moskës dhe Kievit brenda 24 orëve nëse zgjidhet. / New York Post – Syri.net
Burimi