Çfarë do të ndodhë tani me Himarën? Athina pranon dënimin e Belerit, kërkon të lejohet të betohet si eurodeputet

Beleri në gjykatë

Duket se me këtë zhvillim është pajtuar dhe qeveria greke, e cila tani e sheh Fredi Belerin si eurodeputet dhe jo kryetar bashkie…

Gjykata e Apelit ka marrë sot vendimin e formës së prerë për Fredi Belerin, duke e dënuar përfundimisht me 2 vite burg. Dënim ky që nuk është se rëndon shumë pozitat e kryebashkiakut të zgjedhur të Himarës, pasi duke qenë se ndodhet prej një viti në paraburgim, nuk i kanë mbetur dhe shumë ditë për të vuajtur dënimin.
Megjithatë ky dënim i tij, i heq të drejtën të jetë kryetar bashkie. Sipas ligjit, tani qeveria ka të drejtë të bëjë shkarkimin e tij dhe t’i kërkojë presidentit zgjedhje të reja në Himarë. Sipas Kushtetutës, presidenti shpall brenda 2 ditësh zgjedhjet e reja.
“Presidenti i Republikës dekreton datën e re të zgjedhjeve brenda 48 orësh nga marrja e njoftimi. Zgjedhjet mbahen jo më parë se 30 ditë dhe jo më vonë se 45 ditë nga data e njoftimit të ndërprerjes së mandatit”, thekson ligji.
Ndërkohë duket se me këtë zhvillim është pajtuar dhe qeveria greke, e cila tani e sheh Fredi Belerin si eurodeputet dhe jo kryetar bashkie. Në një reagim publik, Ministria e Jashtme greke pranon vendimin dhe kërkon nga autoritet shqiptare që të mos pengojnë betimin e tij si eurodeputet.
“Greqia që në fillim kishte shprehur shqetësimin dhe reflektimin e saj për shumë aspekte të çështjes lidhur me ndjekjen penale të kryebashkiakut të zgjedhur të Himarës, Fredi Beleris.
Në veçanti, rezervat lidhur me cënimin e prezumimit të pafajësisë, natyrën e provave të paraqitura, zbritjen e dënimit të tij, shqiptimin e një dënimi joproporcional dhe heqjen e së drejtës së tij për të bërë betim, me rezultat që Bashkia e Himarës administrohet prej një viti nga persona që nuk kanë legjitimitet demokratik.
Vendimi i sotëm i Gjykatës së Apelit Tiranë vjen në mbështetje të këtyre shqetësimeve për nivelin e shtetit ligjor dhe mbrojtjen e minoriteteve në Shqipëri.
Beleri sot nuk është vetëm kryetar i zgjedhur i Bashkisë së Himarës. Ai është gjithashtu anëtar i zgjedhur i Parlamentit Evropian. Është, pra, një detyrim i autoriteteve shqiptare që të marrin të gjitha masat e nevojshme për t’i dhënë atij mundësinë për të marrë pjesë në punimet e Parlamentit Evropian, duke filluar nga Plenari i tij, korrikun e ardhshëm”, tha Ministria e Jashtme Greke.
Beleri u arrestua me urdhër të Prokurorisë së Vlorës në orët e para të mëngjesit të 12 majit 2023, vetëm dy ditë përpara datës kur do të votohej për të zgjedhur kryetarët e rinj të bashkive. Sipas organit të akuzës, rezultonte se i pandehuri Beleri ka ofruar nga 50 euro për tetë vota. Po ashtu, Beleri u akuzua se i kishte dhënë paratë nëpërmjet të pandehurit tjetër, Pandeli Kokaveshi.
Burimi