Mbyllja e Tik Tok/ Berisha: Rrjeti social do lëshohet më 12 maj

Kreu i Partisë Demokratike, Sali Berisha, ka kritikuar ashpër vendimin e Edi Ramës për mbylljen e platformës Tik Tok, duke e krahasuar atë me vendimet autoritare të liderëve të regjimeve të tjerë. Duke iu përgjigjur komentuesve, Berisha tha se ky akt është i ngjashëm me ndalimin e lirisë së fjalës që ndodh në regjimet e Kabulit dhe Teheranit.
Ai theksoi se ky është një veprim i papranueshëm dhe se Edi Rama ka një histori të errët lidhur me represionin ndaj lirisë së mendimit, duke përmendur një ngjarje të vitit 1988, kur babai i Edi Ramës, firmosi dënimin me vdekje të poetit Havzi Nela për shkak të kritika ndaj regjimit. Berisha e shfrytëzoi këtë për të treguar se Rama po ndjek një linjë të ngjashme represive ndaj kriticizmit dhe lirisë së shprehjes, duke e pasuar këtë me mbylljen e Tik Tok.
Kreu i PD-së siguroi të rinjtë se me datën 12 maj, Tik Tok do të jetë përsëri i aksesueshëm, duke e shpallur atë një protestë të rëndësishme për lirinë e fjalës. Ai gjithashtu u bëri thirrje kompanive të internetit dhe telefonisë celulare të mos bashkëpunojnë me këtë veprim të qeverisë dhe të mos lejojnë bllokimin e platformës. Berisha e përfundoi deklaratën e tij duke theksuar se Shqipëria nuk duhet të barazohet me shtete autoritare, dhe se kjo megacensurë është një hap i rrezikshëm për liritë qytetare.
Pjesë nga fjala e kreut të PD Sali Berisha:
Akti i Edi Ramës për mbylljen e Tik Tok është identik me vendimin e habitullahut të Kabulit dhe Ajetollahut të Teheranit për mbylljen e kësaj platforme të mrekullueshme. Edi Rama ka dhe një problem tjetër madhor në këtë qëndrim.
Ftoj shqiptarët të mos harrojnë se në gusht të vitit 1988, Kristaq Rama asokohe zëvendësi i Nexhmije Hoxhës dhe anëtar kryesor i presidiumit të Kuvendit Popullor, pra i Ramiz Alisë, firmos varjen në litar të poetit Havzi Nela për vargjet e tij kushtuar fjalës së lirë dhe lirisë së mendimit. Me aktin e tij, pas 37 viteve ndaj Tik Tok, Edi Rama dëshmon se po të ishin ligjet e vjetra, nuk do i dridhej dora të varte në litar njëlloj si i atij, njëlloj siç po vepron me Tik Tok, të gjithë ata që do e kritikonim dhe do kenin mendime ndryshe.
Por sot të rinjtë kanë një protestë të madhe dhe kjo është protesta më e rëndësishme e jetës së tyre për lirinë e fjalës. Ndaj dhe unë i përgëzoj ata dhe i garantoj se, me datën 12 maj Tik Toku do të lëshohet menjëherë.
Ftoj kompanitë e internetit dhe të telefonisë celulare të mos bëhen bashkëautore në këtë megacensurë që e barazon Shqipërinë me Afganistanin dhe Teheranin. Ndaj të bëjnë çdo përpjekje që ato vegla që ka blerë Edi Rama për të bllokuar Tik Tokun të mos funksionojnë.
Burimi