Hetimi pasuror, ish-ministri i Brendshëm Saimir Tahiri dy orë në SPAK

Ish-ministri i Brendshëm, Saimir Tahiri është paraqitur ditën e sotme në Prokurorinë e Posaçme kundër Korrupsionit dhe Krimit të Organizuar.
Ai ishte i shoqëruar nga avokati Maks Haxhia, ndërsa mësohet se është thirrur nga prokurori Elvin Goga në lidhje me hetimin pasuror që po zhvillohet ndaj tij.

Tahiri qëndroi në ambientet e SPAK gati dy orë. Në dalje dha një prononcim të shkurtër për gazetarët, duke u shprehur se “nuk kam asgjë për të thënë”.
Më 4 shkurt të vitit 2022, Apeli i Gjykatës Kundër Krimit të Organizuar dhe Korrupsionit pas një seance maratonë, dënoi Tahirin me 5 vite burg për ‘Shpërdorim të detyrës’. Por me gjykim të shkurtuar dënimi u ul në 3 vite e 4 muaj burgim. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Ai qëndroi vetëm një vit e katër muaj në qeli, deri në qershor 2023, kur dhe u mor vendimi që vuajtja e dënimit të mbetur të kryhej në banesë.
Burimi