Procedohet penalisht avokati Genc Gjokutaj, pas thirrjeve për akte ekstreme

Avokati Genc Gjokutaj është proceduar penalisht për veprën penale “Thirrjet publike për veprime të dhunshme“. Ky veprim i institucioneve ndaj Gjokutajt vjen pas një postimi të bërë nga avokati në rrjetet sociale i cili kishte në përmbajtje terma që shprehnin dhunë. 
Gjithashtu në njoftimin e policisisë thuhet se procedimi ndaj avokatit filloi pasi gjatë monitorimit të vazhdueshëm të burimeve të hapura të informacionit nga ana e Sektorit për Hetimin e Krimeve Kibernetike, është konstatuar një postim i publikuar nga Gjokutaj, i cili bën thirrje për të kryer veprime të dhunshme.
Njoftimi:
Specialistët e Sektorit për Hetimin e Krimeve Kibernetike në DVP Tiranë, kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, në ngarkim të shtetasit G .Gj., me profesion avokat, për veprën penale “Thirrjet publike për veprime të dhunshme“, parashikuar nga neni 223 i Kodit Penal.
Procedimi ndaj këtij shtetasi filloi pasi gjatë monitorimit të vazhdueshëm të burimeve të hapura të informacionit nga ana e Sektorit për Hetimin e Krimeve Kibernetike, është konstatuar një postim, i publikuar nga shtetasi G. Gj., i cili bën thirrje për të kryer veprime të dhunshme, postim ky i cili konstatohet se është publikuar dhe në media të ndryshme online. Materialet i kaluan Prokurorisë.
POSTIMI I GJOKUTAJT:
Te dashur Shqiptare!Diktaturat nuk rrezohen me kode zgjedhore!As me amendime ligjesh!Hajduti kapet ne vjedhje dhe jo me permiresim te ligjit apo ashpersim denimi!Vetem revolta popullore dhe forca njerezore shkulin hajdutet nga pushteti!Shqiptare qe e doni Shqiperine dhe jo qe dini shqip!Dilni nga shtepite sot!Thyeni çdo sportel qe ju kerkon shpirtin!Rrihni çdo polic qe mbron hajdutet!“Vrisni” çdo patronazhist qe ju vjedh te ardhmen dhe familjen!Vetem keshtu Shqiptaret mund te behen Zoterinj dhe Shqiperia Zonje!
Burimi