Foto/ Kthyen banesën në shtëpi bari, ja kush janë dy vëllezërit që ishin kthyer nga Anglia, vendosën pajisje kultivimi të teknologjisë së lartë

Detaje të reja kanë dalë në dritë në lidhje me zbulimin e shtëpisë së barit në Laknas.

Vëllezërit Shkëlqim Matraxhi 38 vjeç dhe Fatmir Matraxhi 28 vjeç ranë në pranga, ndërsa babai i tyre Z. M., 66 vjeç, u vu nën hetim, pasi dyshohet se kishte dijeni dhe nuk kishte kallëzuar.
Në vijim të hetimeve, është vënë në pranga edhe punonjësi i OSHEE-së, Endrit Paja, 29 vjeç, për shpërdorim detyre, pasi dyshohet se ka favorizuar këtë veprimtari kriminale duke mos evidentuar lidhjen e paligjshme të energjisë elektrike.
Banesa në të cilën kultivohej kanabisi ishte tre katëshe, ku kati i dytë ishte kthyer në shtëpi bari.
Mësohet se pajisjet e kultivimit ishin të teknologjisë së lartë aq sa largonin edhe erën e hashashit, të mos ndihej në zonën përreth. Madje për t’u kamufluar vëllezërit vendosnin edhe muzikë në banesë.
Sa i përket dy të arrestuarve, ata ishin kthyer nga Anglia dhe kjo ishte hera e dytë që kishin ngritur një shtëpi bari, sipas gazetares së Top Channel, Kleida Muka.
Gjatë kontrollit të banesës u sekuestruan: 20 bimë narkotike Cannabis Sativa, rreth 60 cm të larta, një sasi me lëndë narkotike kanabis të përpunuar, 5 llamba speciale për ndriçim dhe ngrohje, 2 filtra për pastrimin e aromave, 3 ventilatorë freskues, 2 pajisje për matjen dhe rregullimin e temperaturës dhe pajisje të tjera elektrike të përdorura për kultivimin në ambiente të mbyllura.

Top Channel
Burimi