Tag: bandat

Juristi i njohur, Kreshnik Spahiu ka hedhur akuza të forta ndaj Partisë Demokratike, duke deklaruar se pretendimet për “Trenin Bullgar” janë një farsë pa prova dhe alibi për të justifikuar humbjen. Sipas tij, PD kishte komisionerë në çdo qendër votimi, por asnjë nuk arriti të dokumentojë manipulimet që pretendon. Spahiu e quan këtë një marrëveshje të heshtur mes Ramës dhe Berishës për ndarjen e pushtetit dhe kontrollin e Parlamentit. Ai zbulon se para 11 majit është goditur me qëllim Lulzim Basha dhe Shpëtim Idrizi, për të shuar çdo opozitë të vërtetë.
Madje, Spahiu thekson se edhe po të përsëriten zgjedhjet 10 herë, PD do të humbë sërish, pasi është shndërruar në një opozitë të paralizuar. Ndërkohë ai ironizon pretendimet për ndikimin e bandave, duke thënë se nëse ato sigurojnë 40 mijë vota, atëherë problemi nuk është te bandat, por te populli. Për juristin, listat e hapura ishin fiktive, ndërsa gjithçka u vendos nga dyshja Rama-Berisha.
Kreshnik Spahiu rrëzon pretendimet e PD: Treni bullgar, një alibi pa prova
Konkretisht juristi Kreshnik Spahiu thekson se pretendimi i Partisë Demorkatike për “Trenin Bullgar” janë një lojë politike dhe alibi që nuk qëndron dhe nuk shkon me realitetin. Kjo sepse vetë PD-ja kishte numërues dhe komisionerë në çdo qendër e qark dhe është e pashpjegueshme sesi asnjë prej tyre nuk e kapën me prova këtë “lokomotivë’ në 300 mijë vota diferencë me PS-në. “Parimisht dua të them dhe tërheq vëmendjen publikut që të mos kompleksohet dhe shpërqendrohet nga ky teatër pasi PD dhe Sali Berisha do i njohë zgjedhjet pavarësisht se çfarë thonë. Ata në shtator do të jenë në Kuvend dhe do legjitimojnë zgjedhjet sapo të hyjnë dhe betohen në Parlament. Pra nëse shkon atje bashkë me shpurën e tij, ai automatikisht i njeh zgjedhjet. Kjo është lojë dhe rezultat i paracaktuar”, deklaroi ai. Por juristi e sheh më shumë si një rezultat të paracaktuar mes dy liderëve të partive, në marrëveshje para zgjedhjeve.
“Rama mori sa deputetë deshi, Berishës i dha aq sa deshi. Futën në lojë ata që deshën në lista dhe si deputetë dhe nxorën ata që nuk u bënin punë. Shkrinë Ilir Metën me PL që kishte 19 deputetë dikur, shkrin Lulzim Bashën që mandatin e fundit pati 65 deputetë dhe Shpëtim Idrizin”, vijoi Spahiu. Por çfarë mendon ai për pretendimet e PD-së për ‘trenin bullgar’ dhe a qëndrojnë ato si akuza që kanë deformuar rezultatin. “Partitë e reja nuk kanë numërues apo komisioner. Kurse PD kishte detyrimin ligjor të zbulonte trenin bullgar dhe ta kapte. Pra fleta e votimit është mbi një metër dhe të organizosh palosjen dhe ndërrimin e saj në të gjithë këtë proces. Tani në mes këtyre 300 mijë votave në trenin bullgar, këta të Berishës nuk kapën dot asnjë nga pasagjerët e trenit bullgar? Ose treni bullgar nuk ka ndodhur, ose komisionerët e Berishës kanë mbyllur sytë. Budallenj mos të na bëjnë, mos të na fyejnë inteligjencën. Ka pasur parregullsi? Sigurisht ka pasur. Sepse listat e hapura kanë qenë fiktive, kryetarët e partive kanë orientuar votat tek kandidatë të caktuar”, argumentoi Spahiu për Report Tv.
Spahiu: Sikur 10 herë të përsëriten zgjedhjet, 10 herë më keq do humbë PD
Ndërkohë juristi Kreshnik Spahiu u shpreh se zgjedhjet patën problematikat e tyre, por në fund u zgjodhën ata që ishin paracaktuar nga liderët e partive dhe jo nga bandat kriminale. Madje ai shkoi më tej, duke nënvizuar se edhe po të bëhen 10 herë zgjedhjet e parakohshme nga Rama, po aq herë Partia Demokratike do i humbte këto zgjedhje. “Nuk kanë dalë deputetë ata që deshën bandat, por ata që deshën Berisha dhe Rama. Nëse banda krijon aq vota dhe ka influencë sa siguron 40 mijë vota, atëherë është problem popullor, kemi problem si popull. Atëherë këto qenkan banda serioze. Tani ne nuk jemi të çmendur. Unë po them se nëse është e vërtetë se bandat sigurojnë kaq shumë vota, ky është problem i Elbasanit atëherë, në rastin konkret. Unë nuk them se bandat nuk kanë ndikuar, por ama pjesë kanë qenë edhe vetë kryetarët e partive”, nënvizoi juristi për Report Tv. Ai nuk e sheh problemin vetëm tek bandat kriminale, për të cilat nuk beson se ndikon aq thellë në rezultat. “Nëse Rama del sot të thotë se do bëjë zgjedhje të parakohshme, e para që nuk do i dëshirojë është PD-ja dhe Sali Berisha, pasi edhe 10 herë të bëhen ato, po aq herë do humbasë PD-ja, sepse në atë gjendje janë katandisur”, shpjegoi Spahiu.