Shkup, ndryshimet në Kodin Penal ngadalësojnë harmonizimin e legjislacionit me të BE-së

Shkup – Ndryshimet e fundit të Kodit Penal kanë ngadalësuar procesin e harmonizimit të legjislacionit tonë gjyqësor me atë të BE-së. Ky është konstatimi i përgjithshëm i ekspertëve juridik dhe ekonomik nga vendi dhe jashtë, sa i përket ndryshimeve të Kodit Penal. Ata janë të mendimit se ndryshimet e bëra nën arsyetimin se po ndërmerren masa kundër krimit ekologjik dhe armatimin, kanë shkaktuar vjetërsimin e veprave për keqpërdorim të funksioneve dhe thirrjeve publike, ndërsa në dispozicion mbetet vetëm konfiskimi i pronës së paligjshme, e cila duhet të zbatohet në rast të vjetërsimit të këtyre lëndëve.
“Ajo që na mbetet në dispozicion është konfiskimi i pronës në rast të pengesave teknike apo praktike, respektivisht konfiskimi i lëndëve të vjetërsuara duhet sa më shpesh të zbatohet në praktikë. Andaj themi se duhet të fokusohemi në këtë drejtim për t’i minimizuar gabimet dhe pasojat e dëmshme.”, – deklaroi profesoresha universitare, Aleksandra Deanoska, sipas Zhurnal.
Për të përmirësuar vlerësimin e BE-së për fushën e “luftës kundër krimit dhe korrupsionit”, Qeveria e re duhet të përmirësojë gabimet e së kaluarës, vlerësojnë nga Konventa Kombëtare e Bashkimit Evropian në Maqedoninë e Veriut.
“Koalicioni i cili bëri këto vepra të këqija nuk është më në pushtet, tashmë kemi një koalicion tjetër qeveritar, e cila derisa ishte në opozitë me fjalë i dënonte këto vepra, tani mbetet për t’u parë nëse ata do të jenë të gatshëm të bëjnë të kundërtën dhe të përmirësojnë gabimet e së kaluarës.”, – theksoi kryetari i Këshillit të ambasadorëve, Muhamet Halili.
Ndryshimet e fundit të Kodit Penal u miratuan në shtator të vitit të kaluar, ndërsa ekspertët juridik të Romanisë, pjesëmarrës në seancën e 14-të të Grupit Punues 3 “Gjyqësia dhe të drejtat themelore”, të organizuar nga Konventa Kombëtare, këshilluan se të gjitha ndryshimet në gjyqësor të bëhen përmes debateve të gjëra dhe në mënyrë transparente.
Burimi