Çështja e profesionistëve të lirë, Tabaku replikë me ministrin e Financave: Qeveria duhet t’ua kthejë paratë e mbledhura përmes taksës antikushtetuese

Panorama.com.al

12/09/2024

👁1790

Gjatë seancës së sotme parlamentare, deputetja e Partisë Demokratike, Jorida Tabaku pati një replikë me ministrin e Financave për Profesionet e Lira.

Tabaku ngriti sërish çështjen e profesionistëve të lirë, të cilët kanë paguar një taksë që tashmë është shpallur antikushtetuese nga Gjykata Kushtetuese.
Ajo pati një përplasje për shumën e grumbulluar nga Drejtoria e Tatimeve tek 10 mijë profesionistë të lirë.
Deputetja tha se shuma e kundërshtuar nga ministri kishte burim Drejtorinë e Tatimeve, janë mbledhur rreth 10 milionë euro nga 10 mijë profesionistë të lirë, ndërsa Ministri i Financave ka raportuar një shifër prej 5 milionë eurosh.
Ajo theksoi se, pavarësisht shumës së mbledhur, çdo lek i marrë nga këta profesionistë është i padrejtë dhe duhet t’u kthehet atyre.
“Ai vendim i Gjykatës Kushtetuese që e shpalli këtë taksë si antikushtetuese është ende në fuqi. Sot, dje dhe nesër, mbetet i njëjti, taksa ishte dhe është antikushtetuese. Pavarësisht nëse profesionistët e lirë e kanë paguar apo jo, këto para duhet t’u kthehen, “ deklaroi Tabaku gjatë fjalës së saj.
Deputetja gjithashtu vuri në dukje faktin që, ndërkohë që shtohen miliona euro për tre kompani me justifikimin e rritjes së çmimeve, shteti vazhdon të neglizhojë të drejtën e profesionistëve të lirë për kthimin e parave të tyre.
“Çfarë ndodh kur një tatimpagues është në borxh me shtetin? Ai paguan gjobat dhe kamatëvonesat. A po merr qeveria përgjegjësinë për shkeljen e vendimit të Gjykatës Kushtetuese? ” përfundoi Tabaku, duke bërë thirrje për zbatimin e menjëhershëm të vendimit dhe kthimin e fondeve për profesionistët e prekur.
Replika e Tabakut me Ministrin e Financave:
Z. Ministër, Drejtoria e Tatimeve që ju drejtoni thotë se janë mbledhur 10 milionë euro nga 10 mijë profesionistë të lirë, ndërsa ju thoni 5 milionë euro. Edhe pse në këtë parlament kam folur me shifra dhe fakte, qoftë edhe 1 lek i marrë nga profesionistët e lirë, çfarë do të thotë? Po ndryshon buxhetin dhe po i shton tre kompanive 15 milionë euro sepse u janë rritur çmimet. Po këto? Nëse një tatimpagues është borxhli ndaj shtetit, çfarë ndodh? Shteti fillon me kamatëvonesa, paguan gjobën, dhe çfarë kujton Gjykatën Kushtetuese? Një zyrë nën varësinë e Ministrisë së Financave interpreton vendimin për ju? Gjykata Kushtetuese ka marrë një vendim që taksa e profesionistëve të lirë është antikushtetuese. Është sot, ishte dje, dhe do të jetë edhe nesër! Nuk ka rëndësi kur e ke paguar. Në thelb, është antikushtetuese dhe duhet t’u kthehet atyre që u takon.

NDIQE LIVE “PANORAMA TV”