‘MCA’ në Kuvend/ Deputetët diskutojnë humbjen e jetës së Pal Trashaj. A do të japë llogari Gent Sejko?

deputetët dhe Gent Sejko

TIRANË- Përpos rendit të ditës, pjesë e diskutimeve në seancën e sotme plenare është bërë edhe vetëvrasja e Pal Trashaj para godinës së SPAK, për shkak të një kredie që kishte marrë pranë MCA. Trashaj është viktima e parë e kompanive të mbledhjes së kredive të këqija. Depuetët në Kuvend kanë diskutuar rastin e 63-vjeçarit dhe kërkojnë një sqarim nga guvernatori i Bankës së Shqipërisë, Gent Sejko.
Kreu i grupit parlamentar të Partisë Demokratike, Gament Bardhi tha se Trashaj nuk është rasti i vetëm, ndërsa përgjegjës bëri Guvernatorinë e Bankës së Shqipërise, i cili sipas tij ka përgjegjësi ligjore. Sipas tij, askush nuk flet për abuzimet në Bankën e Shqipërisë edhe pse në media janë të publikuara edhe me fakte. Bardhi në fund u shpreh se vetëvrasja e Pal Trashajt është përgjegjësi e të gjithëve dhe duhet të lexohet njoftimi i Prokurorisë së Tiranës për Bankën e Shqipërisë dhe të mos mbyllen sytë nga Gent Sejko.

“Guvernatori i Bankës së Shqipërise ka përgjegjësi ligjore. Po ne e dimë që ti marrësh shtëpinë dhe pasurinë një familje shqiptare, është njësoj si ti marrësh jetën.  Ata kanë punuar për të pasur një shtëpi dhe e gjen veten nga 700 mijë lekë kredi në 7 milionë lekë. Kjo  nuk është çështje që duhet të na ndaj ne kemi pjekurinë për ti shërbyer këtyre qytetarëve duke evidentuar përgjegjësit e guvernatorit dhe arsyet që e kanë cuar atë që të mos veprojë në kohë, si i ka licensuar këto kompani dhe kur ka vepruar që ti heq licensën. Për këto guvernatori i Bankës do të duhet që të jap llogari në Kuvend. Duhet të hetojmë nëse interesat e kompanive të lidhura me Guvernatorin e Shqipërisë e kane nxitur atë të mos ndërmarrë veprime”, tha Bardhi.
Në replikë ndaj demokratit, deputeti i Partisë Socialiste, Eduard Shalsi, tha se nuk mund të përdoret ajo ngjarje për të sulmuar institucionet e pavarura. Shalsi shtoi se nuk e mbështeste gjuhën e përdorur nga Bardhi për denoncimin e rastit dhe akuzat që demokrati ngriti ndaj guvernatorit të Bankës së Shqipërisë, Gent Sejko, ku sipas tij nuk është një ‘halabak rrugësh”.
“Po merrem shumë seriozisht me atë rast që të kuptoj pse ka ndodhur dhe kush janë faktorët. Nuk janë prokuror, por nuk mund të them që i kanë marrë shtëpinë kur nuk janë kanë marrë. Flisni për Gent Sejkon, por është guvernator, nuk është halabak rrugësh. E thërritëm, do vazhdojmë. Por mos bëni qaramanin, ejani, analizoni, mos u bëni edhe specialistë të midhjes dhe të peshkut me një fjalor aspak të denjë, jo për deputet por edhe për kafet e nderuara të Tiranës. Më të kujdeshëm…mendoni pak përpara atë që thoni. Edhe në etiketime edhe në fjalët që mbajmë,”-tha Shalsi.
Pas tyre një reagim erdhi edhe nga deputeti Erion Braçe, i cili po ashtu tregoi se ngjarja është e dhimbshme dhe nuk duhet të përdoret, duke reshtuar disa sqarime në lidhje me normën efektive të interesit të Bankës së Shqipërisë. Sa i përket thirrjes në Kuvend të Gent Sejkos, Braçe u shpreh se tashmë është thirrur dy here dhe ka dhënë sqarime me detaje.
“Çfarë ka bërë BSH ka futur konceptin e normës efektive të interesit. Interesat kanë rënë më 5 herë. Kur fola atëherë isha komunisti që nuk e doja sistemin privat. Tani do abuzuar me Pal Trashajn se duhet populizmi. Guvernatori është thirrur 2 herë dhe ka dhënë sqarime me detaje për të kuptuar ne përmasën e gjësë. Natyrisht për të çliruar ata njerëz që janë bërë pjesë e këtij zinxhiri. Ka ndodhur që guvernatori mund të thirret sërish..”-tha Braçe.

Ndërkohë edhe deputeti Agron Shehaj ka sjellë në vëmendje të Kuvendit ngjarjen tragjike të ndodhur dy ditë më parë, ku Pal Trashaj i cili ra “pre” e mashtrimit nga mikroreditë ndërmori aktin ekstrem të vetëflijimit. Shehaj në lidhje me rastin bëri përgjegjës Guvernatorin e Shqipërisë, Gent Sejko, ministrin e Drejtësisë, Ulsi Manja si dhe çdo deputet në atë Parlament të cilët nuk parandaluan veprimet kriminale të MCA-së.
“Kush është përgjegjës për vdekjen e tij? Të gjithë. Është përgjegjës Guvernatori i Bankës së Shqipërisë i cili prej vitesh është në dijeni të skemës së mashtrimit të MCA dhe i ka lejuar ata. Është përgjegjës ministri i Drejtësisë që nuk parandaloi veprimet kriminale të përmbaruesve, është përgjegjës drejtësia që nuk veproi për ta ndaluar në kohë këtë aktivitet kriminal që ushtrohet prej kohësh, është përgjegjës dhe ky parlament dhe qeveri që janë zgjedhur për të mbajtur anën e qytetarëve”, tha Shehaj.

Pal Trashaj dha jetë ditën e djeshme, një ditë pasi konsumoi fostoksinë në hyrje të SPAK. Prej kohësh ai kërkonte një takim me kreun e SPAK Altin Dumani, për t’i shpjeguar atij, të gjithë zhvatjen që i ishte bërë nga kompania MCA, e cila merret me mbledhjen e kredive të këqija në vendin tonë. Prej kohësh ai kërkonte një takim me kreun e SPAK Altin Dumani, për t’i shpjeguar atij, të gjithë zhvatjen që i ishte bërë nga kompania MCA, e cila merret me mbledhjen e kredive të këqija në vendin tonë. Që prej aktit të rëndë, ende nuk ka pasur asnjë reagim as nga Banka e Shqipërisë dhe as nga guvenatori Gent Sejko. Pas thirrjes ngelet për tu parë nëse guvernatori i Bankës së Shqipërisë, Gent Sejko do të paraqitet në Kuvend apo do të reagojë në lidhje me vetëvrasjen e Pal Trashaj./ZËRI
Burimi