Ish-i i Bayernit dhe Gjermanisë i thotë “jo” Chelsea-t, pret shkarkimin e Xavit
Hansi Flick, 59 vjeç, vazhdon të ëndërrojë për t’u bërë trajner i Barcelonës. Pavarësisht se disa skuadra të Premier League-s janë në dijeni të situatës së tij, – mes tyre edhe Chelsea, pasi klubi “blu” zyrtarizoi largimin e Mauricio Pochettinos – trajneri gjerman nuk do të bëjë asnjë hap derisa të përcaktohet situata në Barcelonë. Flick i ka thënë tashmë “jo” Chelsea-t dhe i jep përparësi klubit të Barçës mbi propozimet që ka në tavolinë.
Ish-trajneri i Bayern Munichut dhe ish-trajneri i Gjermanisë ishte shumë pranë pankinës së Barçës një muaj më parë, para takimit në shtëpinë e Laportës me Xavin, ku u konfirmua trajneri aktual i “blaugranave”. Megjithatë, skenari i ri që është hapur te Barcelona, pas zemërimit monumental të Laportës, ka bërë që Flick të ketë sërish mundësi për të drejtuar pankinën e Barçës.
Vendimi, siç njofton “El Mundo Deportivo”, do të merret pas ndeshjes ndaj Sevillas, në takimin e së hënës së ardhshme, ku, përveç Laportës dhe vetë Xavit, do të jenë të pranishëm edhe drejtori sportiv Deco, zëvendëspresidenti sportiv, Rafa Yuste, dhe anëtarët e tjerë të komisionit të sportit.
Flick ka si menaxher të tij Pini Zahavin, përfaqësues i Robert Lewandowskit, i cili gjithashtu ka një marrëdhënie shumë të mirë me presidentin Joan Laporta./Super Sport
Top Channel
Burimi
