Teksa vendet e BE-së shtrëngojnë kufijtë, Spanja e sheh me pozitivitet migracionin

Kryeministri Pedro Sanchez njoftoi të mërkurën masa, për ta bërë më të lehtë vendosjen e emigrantëve në Spanjë, duke mbrojtur migrimin dhe përfitimet e tij ekonomike, edhe pse qeveritë e tjera evropiane kanë shtrënguar kufijtë e tyre kundër të ardhurve.
Për të ndaluar emigrantët pa dokumente, Gjermania, Sllovakia dhe Hungaria kanë rifutur kontrolle të përkohshme kufitare, në atë që ishte zemra e zonës së hapur të udhëtimit Shengen të Bashkimit Evropian. Franca thotë se po shqyrton lëvizje të ngjashme, ndërkohë që Italia synon të ngrejë kampe ndalimi në Shqipërinë jashtë BE-së për emigrantët e kapur në det.
 “(Emigracioni) nuk është vetëm një çështje humanitare…, është gjithashtu i nevojshëm për prosperitetin e ekonomisë sonë dhe qëndrueshmërinë e shtetit të mirëqenies”, tha Sanchez në një fjalim në parlament. “Çelësi është në menaxhimin e mirë.”
Spanja do të punojë për ta bërë më të lehtë për migrantët që të vijnë me një sërë iniciativash, duke përfshirë njohjen e kualifikimeve akademike për punëtorët e përkohshëm, thjeshtimin e kontratave si pjesë e një programi të ri të migracionit për motive punësimi dhe reduktimin e burokracisë për aplikimet për qëndrim, tha Sanchez.
Ekonomia e Spanjës është me rritjen më të shpejtë në BE, e nxitur pjesërisht nga një valë emigrantësh të aftë nga Amerika Latine, të cilët kanë mbyllur mungesën e fuqisë punëtore në sektorë të tillë si teknologjia dhe mikpritja.
Sanchez, kreu i Partisë Socialiste të Spanjës, tha se emigrantët me aftësi të ulëta ndihmuan gjithashtu ekonominë, duke punuar në “punë të padukshme”. Pa to, tha ai, sektorë të tillë si ndërtimi, bujqësia dhe hoteleria do të shemben.
Diku tjetër në 27-vendet e BE-së disponimi është kthyer gjithnjë e më armiqësor ndaj migracionit, me mbështetjen në rritje popullore për partitë konservatore dhe të ekstremit të djathtë që kërkojnë kontrolle më të ashpra.
Përpara një samiti javën e ardhshme, 17 shtete anëtare të BE-së i kërkuan Komisionit Evropian javën e kaluar të mprehte rregullat e BE-së, për kthimin e emigrantëve të parregullt në vendet e tyre.
Sanchez tha se Spanja do t’i kërkojë Komisionit Evropian të avancojë me një vit deri më 2025 nisjen e një pakti të migracionit, që do të bënte që vendet anëtare të BE të ndajnë shpërndarjen e emigrantëve dhe azilkërkuesve bazuar në PBB, popullsi dhe kritere të tjera.
NDIHJA ANTI-EMIGRANTE RRITET NË SPANJË
Megjithatë, edhe në Spanjë, ndjenjat kundër emigrantëve po rriten. Një sondazh i fundit i publikuar nga gazeta El Pais, zbuloi se 57% mendonin se kishte shumë emigrantë në vend.
Pikëpamje të tilla nxisin një rritje të mbështetjes së fundit për partitë e ekstremit të djathtë në 15.4%, sipas një sondazhi tjetër për El Pais.
Udhëheqësi i ekstremit të djathtë, Santiago Abascal tha se migrimi po shkaktonte një rritje të krimit të dhunshëm dhe duke tensionuar shërbimet sociale.
“Ata na thonë se ka nevojë për punë emigrantësh, por na fshehin se punëtorët e rinj spanjollë shpesh duhet të largohen nga Spanja për të përballuar jetesën,” tha Abascal.
Ndërsa shkalla e papunësisë në Spanjë është në nivelin më të ulët që nga viti 2008, ajo mbetet ndër më të lartat në Evropë, veçanërisht tek të rinjtë.
Sanchez tha se vetëm 6% e emigrantëve hyjnë ilegalisht në Spanjë, shumica e tyre vijnë nga deti nga Afrika Perëndimore nëpërmjet Ishujve Kanarie. Sipas të dhënave të Ministrisë së Brendshme, rreth 30,808 emigrantë mbërritën në Kanarie përmes detit me anije peshkimi të pasigurta në nëntë muajt e parë të 2024-ës, dy herë më shumë se në të njëjtën periudhë të vitit të kaluar.
Ai u bëri thirrje kundërshtarëve politikë të negociojnë për ndarjen e barrës për pranimin e të miturve të pashoqëruar midis rajoneve autonome të Spanjës, dhe hodhi poshtë një propozim për të rritur monitorimin e detit.
“E djathta dëshiron që marina të mos ndihmojë në mbytjet e anijeve dhe t’i përkushtohet fundosjes së tyre”, tha Sanchez. “Dërgimi i fregatave kundër varkave është pikërisht kjo.”
Por Alberto Nunez Feijoo, kreu i Partisë Popullore konservatore të opozitës, kritikoi Sanchez për mungesën e veprimeve të tij në krizën e migracionit në Ishujt Kanarie.
“Nuk ka politikë më çnjerëzore migracioni se ajo që nuk ekziston. Çdo varkë që niset për në Spanjë, duke rrezikuar jetë, është një dështim i qeverisë tuaj,” tha ai./ Reuters.
Burimi