Vrasja e 14-vjeçarit/ Protestuesit paralajmërojnë bojkot të procesit mësimor, thirrje prindërve: Mos çoni fëmijët në shkollë nëse…

Protesta e dytë e cila u mbajt sot në Tiranë për vrasjen e 14-vjeçarit, Martin Cani, ka përfunduar.

Në mbyllje të protestës, qytetarët u bënë thirrje prindërve që së bashku me fëmijët të bojkotojnë procesin mësimor ditën e mërkurë.

Protestuesit paralajmërojnë bojkot të procesit mësimor nëse nuk marrin përgjigje nga Ministria e Arsimit për tetë kërkesat e tyre.

“Ata kanë thënë se do presin deri ditën e mërkurë për të marrë përgjigje për 8 kërkesat e tyre dhe nëse nuk do ketë një reagim nga ministria e arsimit u kanë bërë thirrje prindërve që së bashku me fëmijët ditën e mërkurë në orën 8 të mëngjesit të bojkotojnë procesin mësimor dhe të zhvendosin protestën para shkollave”, raporton gazetari Renaldo Salianji.

Martin Cani u vra më 18 nëntor, në mes të ditës më thikë nga bashkëmoshatari i tij, Mario Përlleshi. Ditën e premte, 22 nëntor, u zhvillua seanca gjyqësore në ambientet e një spitali privat në Tiranë ndaj 14-vjeçarit që vrau me thikë bashkëmoshatarin e tij, Martin Cani.
Gjyqtarja Lorena Çabej pasi dëgjoi palët, vendosi masën “arrest me burg” për Mario Përlleshin.

Gjyqtarja dhe prokurori i çështjes mbërritën mëngjesin enë spitalin privat në kryeqytet, ku i mituri Mario Perlleshaj, i dyshuar si autor i krimit, merr ndihmë mjekësore për shkak të lëndimeve që ka marrë gjatë konfliktit me bashkëmoshatarin e tij, më 18 nëntor.
I mituri akuzohet si i dyshuar për kryerjen veprës penale “Vrasje e kryer ne rrethana cilesuese”.
Grupi hetimor ka sekuestruar kamerat e sigurisë në zonë, ku dyshohet se autori është larguar me vrap me shokët dhe kushërinjtë e tij.
Kamerat janë sekuestruar pasi dyshohet se ka pasur persona të tjerë që kanë marrë autorin dhe e kanë larguar nga vendngjarja.

NDIQE LIVE “PANORAMA TV”

© Panorama.al
Burimi