Sali Berisha u la i lirë, mbërrin para banesës makina e ish-kryeministrit

Panorama.com.al

27/11/2024

👁497

Pasi Gjykata e Posaçme vendosi revokimin e masës së sigurisë “arrest në shtëpi” ndaj Sali Berishës, poshtë banesës ish-kryeministrit ka mbërritur makina e tij.

Ende nuk dihet se cila do të jetë lëvizja e parë e Berishës, pas lirmit, thuajse 11 muaj pasi ndaj tij u ashpërsua masa e sigurisë nga ‘detyrim paraqitje’ në ‘arrest në shtëpi’.
Kujtojmë se Berisha prej datës 30 dhjetor të vitit 2023 ndodhet në arrest shtëpie.
“Zëvendësimin e masave të sigurimit personal me karakter shtrëngues “detyrimi për t’u paraqitur në policinë gjyqësore”parashikuar nga neni 234 i K.Pr.Penale dhe “Ndalim i daljes jashtë shtetit” parashikuar nga neni 233 i K.Pr.Penale, caktuar me vendimin Nr.112, datë 20.10.2023, verifikuar me vendimin nr. 117 datë 26.10.2023, të Gjykatës së Posaçme të Shkallës së Parë për Korrupsionin dhe Krimin e Organizuar, lënë në fuqi me vendimin nr. 56 datë 21.11.2023, të Gjykatës së Posaçme të Apelit për Korrupsionin dhe Krimin e Organizuar, me masën e sigurimit personal shtrëngues “arresti në shtëpi”, parashikuar nga neni 237 i K.Pr.Penale, ndaj shtetasit nën hetim Sali Berisha, i biri i Ram-ës dhe i Shiqere-s, i datëlindjes 15.10.1944, lindur në Tropojë, me nr. personal E40701031R, i dyshuar për kryerjen e veprës penale “Korrupsioni pasiv i funksionarëve të lartë shtetërore ose të zgjedhurve vendorë”, kryer në bashkëpunim, parashikuar nga neni 260 e 25 i Kodit Penal”, thuhej në vendimin e GJKKO-së të datës 30 Dhjetor 2023.
Sali Berisha është marrë i pandehur nga Gjykata e Posaçme për veprën penale të korrupsionit së bashku me dhëndrin e tij, Jamarbër Malltezi, për dosjen “Partizani”.
Si Berisha ashtu edhe Malltezi i kanë kundërshtuar, duke e cilësuar vendimin për vendosjen e tyre nën arrest shtëpie si përpjekje për asgjësimin e opozitës.

NDIQE LIVE “PANORAMA TV”