“‘Paketa e Maleve’ shkel ligjin dhe favorizon abuzimet me pronën”- Jorida Tabaku: Ky nuk është integrim europian, kjo është hipokrizi politike

Panorama.com.al

10/03/2025

👁815

Deputetja e PD-së Jorida Tabaku e cilësoi “Paketën e Maleve” si një ligj të pastër klientelist dhe antikushtetues, i cili shkel hapur parimet e një tregu të lirë dhe konkurrues.

“Ju sot po sillni një projektligj që bie ndesh me vetë ligjet që keni miratuar në vitin 2020 dhe me parimet e prokurimit publik që kërkojnë transparencë dhe garë të hapur. Ky nuk është as integrim europian, as reforma që na çojnë përpara – ky është një ligj i pastër korruptiv!” – u shpreh Tabaku.
Ajo akuzoi mazhorancën për krijimin e një skeme të re për të shpërblyer klientët politikë në prag zgjedhjesh, duke shpërndarë prona publike pa asnjë mekanizëm kontrolli.
“Pse një qytetar nga diaspora nuk mund të marrë pjesë në këtë proces? Pse prona u jepet atyre që e kanë zaptuar për 10 vjet dhe jo nëpërmjet një gare të hapur? Kjo nuk është as reformë, as zhvillim ekonomik – kjo është legalizim i vjedhjes dhe favorizim i klientëve tuaj!” – tha ajo.
Deputetja demokrate theksoi se ky ligj bie ndesh me angazhimet e qeverisë për negociatat me BE, veçanërisht në kapitullin 5, ku flitet për garantimin e klimës së biznesit, investimeve të huaja dhe ndalimin e përjashtimeve me ligj.
“Ju vetë keni deklaruar se do të hiqni dorë nga përjashtimet me ligj, por sot vini dhe sillni një projektligj që pikërisht krijon përjashtime. Ky nuk është integrim europian, kjo është hipokrizi politike!” – tha Tabaku.
Ajo ngriti gjithashtu shqetësimin për fuqinë e pakufizuar që ky ligj i jep pushtetit vendor në përcaktimin e zonave të veçanta të zhvillimit, duke theksuar mungesën e një mekanizmi kontrolli.
“Kush do të bëjë kontrollin? Çfarë roli ka KLSH? A ka këtu transparencë? Apo thjesht po i varni një kumbonë në qafë pushtetit vendor për të larë duart?” – deklaroi Tabaku, duke paralajmëruar se ky ligj është një përsëritje e skemës klienteliste të Korporatës së Investimeve, që në fillim u mohua, por më pas doli se ishte një ligj me porosi.
“Ky është një ligj që shkel çdo normë të shtetit të së drejtës dhe të ekonomisë së lirë. Me këtë ligj ju po e bëni Shqipërinë një vend ku prona shtetërore shpërndahet me vendime politike dhe jo me rregulla të qarta dhe të drejta. Kjo nuk është as reformë, as zhvillim – është kapje e shtetit!” – përfundoi Tabaku.
Fjala e Deputetes së PD, Jorida Tabaku, në Komisionin e Çështjeve Europiane mbi Paketën e Maleve
Pas një beteje të gjatë të zhvilluar nga Partia Demokratike, nga parlamenti, komisionet dhe deri në KQZ, fatkeqësisht, paketa e maleve rikthehet në Kuvend pas një vendimi të KQZ-së. E konsideroj këtë një vendim të nxituar, pasi bie ndesh me ligjin e miratuar bashkërisht, i cili ndalon votimin e ligjeve për qëllime politike përpara zgjedhjeve. Ky projektligj cenon të drejtat e pronës private dhe krijon një precedent të rrezikshëm për ligjshmërinë dhe drejtësinë në vend.
Në parim, unë jam kundër ligjeve që vendosen pa konkurrencë dhe në kundërshtim me Marrëveshjen e Stabilizim-Asociimit (MSA), veçanërisht me nenin 71 të saj. Ky projektligj shkakton dy probleme madhore:

Legalizimi i zaptimit të pronës – Sipas jush, kushdo që ka në posedim një tokë në mënyrë të paligjshme për 10 vjet, mund ta blejë atë për 1 euro. Kjo nënkupton se nuk bëhet asnjë dallim midis pronarëve legjitimë dhe atyre që kanë zaptuar pronën.
Kontradikta me ligjin e vitit 2020 – Ky projektligj krijon një procedurë të re për pronësinë private, duke anashkaluar ligjin sektorial ekzistues për pronat dhe duke krijuar pasiguri ligjore.

Gjithashtu, mungesa e konkurrencës krijon pabarazi. Një shqiptar nga diaspora nuk ka asnjë mundësi të përfitojë nga ky ligj, sepse përfituesit janë paracaktuar. Nuk ofrohet asnjë sqarim nëse një shqiptar nga diaspora mund ta blejë apo ta shesë pronën e tij, nëse i falen taksat apo nëse mund ta legalizojë atë në mungesë të një tregu të lirë dhe të hapur.
Më shqetësuese është fakti që qeveria, nga njëra anë, angazhohet në negociatat për grupkapitullin 5, ku flet për një klimë të hapur biznesi, investime të huaja dhe ndalimin e përjashtimeve nga ligjet, ndërsa nga ana tjetër, sjell një ligj që pikërisht përjashton. Kjo është një hipokrizi politike dhe ekonomike.
Po ashtu, ky ligj i jep pushtet të pakufizuar njësive të qeverisjes vendore për të përcaktuar zonat e veçanta të zhvillimit, pa asnjë mekanizëm kontrolli nga KLSH apo ndonjë institucion tjetër monitorues. Nuk ka asnjë garanci për transparencë në këtë proces, duke e kthyer këtë ligj në një mekanizëm të përsosur për abuzime.
Kujtoj se ky projektligj është i përjashtuar edhe nga ligji i prokurimit publik, të cilin qeveria e ndryshoi bazuar në propozimet e mia disa vite më parë, për ta rrëzuar më pas dhe për ta rikopjuar. Ligji i prokurimit publik, i përafruar me direktivën e BE-së, përcakton qartë se pronat shtetërore duhet të jepen me garë të hapur, jo me urdhër të qeverisë. Pra, pse nuk zbatohet ky ligj për pronat që diskutohen në këtë paketë?
Ky është një ligj tërësisht korruptiv dhe i padrejtë, si për pronarët legjitimë të tokave, ashtu edhe për integritetin e procesit. Me këtë ligj, qeveria i dhuron tokën dikujt që e ka zaptuar për vetëm 1 euro, njësoj siç ndodhi me Korporatën e Investimeve, një projekt që në fillim nuk u mor seriozisht, por që tani po rezulton të jetë një ligj me porosi.
Së fundi, mungesa e një mekanizmi të qartë për verifikimin e pronarëve legjitimë dhe për kompensimin e tyre nga Agjencia e Kthimit dhe Kompensimit të Pronave e bën këtë ligj edhe më të rrezikshëm. Nuk ka asnjë procedurë për të siguruar që prona e legalizuar nuk ka një pronar legjitim që nuk e ka marrë ende të drejtën e tij. Nuk ka asnjë analizë për ndikimin financiar të përjashtimeve nga taksat në buxhetin e shtetit. Dhe më shqetësuese, ky ligj legjitimon zaptimin e pronave, duke e kthyer atë në normë.
Një qeveri që flet për turizëm të qëndrueshëm dhe zhvillim ekonomik nuk mund të ndërtojë një model të tillë mbi vjedhjen e pronës private dhe abuzimin me ligjin. Ky projektligj nuk është asgjë më shumë se një tjetër përpjekje për të favorizuar klientët e radhës të qeverisë, në dëm të interesit publik dhe të pronarëve legjitimë.

NDIQE LIVE “PANORAMA TV”