“Hyu Kadare ishte i rrallë dhe i jashtëzakonshëm”- Spiropali për ndarjen nga jeta të shkrimtarit: Ushqeu shpirtërisht dhe lartësoi mendërisht një popull të tërë

Ministrja e Shtetit për Marrëdhëniet me Parlamentin, Elisa Spiroplai, përmes një postimi në Facebook, ka reaguar për ndarjen nga jeta të shkrimtarit të madh, Ismail Kadare.

Spiropali, duke ndarë një foto me shkrimtarin shkruan se ‘Hyu Kadare ishte i rrallë, i çmuar dhe i jashtëzakonshëm, ndërsa shton se ‘ushqeu shpirtërisht dhe lartësoi mendërisht një popull të tërë’.
Ndër të tjera, ministrja shpehet se Kadarenë duhet ‘ta nderojmë, respektojmë, kujtojmë në pafundësi, është më e pakta që duhet dhe mund ta bëjmë për Hyun Kadare që erdhi na fali gjithçka, dhe iku pa na marrë asgjë’.
Postimi i Spiropalit:
Hyu Kadare
Hyu Kadare nuk qe një ardhës dhe ikës i zakonshëm, një shëtitës, një kalimtar, ndër të shumtit e kësaj bote.
Hyu Kadare ishte i rrallë, i çmuar, i jashtëzakonshëm.
Kadare ishte nga raca e qiellorëve, gjenialëve, profetëvë. Atyre që popujve, kombeve, komuniteteve, bashkësive, racave, u sjellin fat kur janë në mjerim, u tregojnë zgjidhje kur janë në hall, në vështirësi, në moment kritik, u sjellin një udhërrëfyes kur nuk dinë nga t’ia mbajnë, kur zjarri po fiket dhe duhet ndezur, kur drita meket dhe duhet gjallëruar.
Hyu Kadare erdhi, mblodhi shkarpat, ndezi zjarrin, edukoi brezat, frymëzoi miliona individë, nuk la të degradojë shija, të shprishet estetika, të kalbet dëshira për të lexuar, punuar, kontribuar për një Shqipëri të mbarë e të begatë.
Kadare ushqeu shpirtërisht dhe lartësoi mendërisht një popull të tërë.
Kadare e ngriti Shqipen dhe Shqipërinë në lartësi dhe largësi të panjohura më parë.
Mjerë kritizerët trukokallë që thonë se qe i tillë si shkrimtar, e i atillë si njeri, dhe broçkulla të tjera që Hyut veçse ia shtojnë lavdinë, dhe mediokrit i hedhin në honet e harresës.
Ta nderojmë, respektojmë, kujtojmë në pafundësi, është më e pakta që duhet dhe mund ta bëjmë për Hyun Kadare që erdhi na fali gjithçka, dhe iku pa na marrë asgjë.
Mall🖤

NDIQE LIVE “PANORAMA TV”

© Panorama.al
Burimi