Vrasja e 42-vjeçarit në Pogradec, gazetari: Ngjarja nuk është zbardhur ende, dyshime për veprimet e policisë
Viktima, Eglantin Proga
Gazetari Igli Çelmeta ka zbardhur detaje lidhur me ngjarjen e rëndë të ndodhur dy ditë më parë në Pogradec, ku 42-vjeçari Eglantin Proga u dhunua brutalisht nga 29-vjeçari, Denis Meçe.
Proga humbi jetën si pasojë e dhunës, ndërsa Policia dha njoftimin e parë zyrtar lidhur me ngjarjen e rëndë, mëngjesin e së dielës, ku bëhej e ditur arrestimi i autorit të dyshuar dhe 3 personave të tjerë për “moskallëzim krimi”.
Çelmeta tha se kemi pasur raste kur policia jep njoftime zyrtare për ngjarje nga më banalet, ndërkohë që nuk dha njoftim zyrtar lidhur me një krim të tillë.
“Personi i dyshuar si autor i krimit ka lidhje me një personazh që ka lidhje politike, që ka pushtet në Pogradec, dhe kjo mund të jetë arsyeja sepse nuk patëm një njoftim zyrtar”, tha gazetari, duke ngritur dyshime për atë se çfarë ndodhi në raport me policinë.
Çelmeta tha se ajo që e bën akoma më të rëndë ngjarjen është fakti se viktima ka qëndruar rreth 30 minuta i shtrirë në rrugë dhe nuk i është dhënë ndihma e parë.
“Në vitin 2024, në një qytet si Pogradeci të mos shkojë një ambulancë kur ka një person të shtrirë në rrugë, kjo është e pafalshme. Sot Drejtori i Përgjithshëm i Policisë së Shtetit ka urdhëruar nisjen e një inspektimi lidhur me veprimet e policisë, si u veprua në orët e para pas ngjarjes, çfarë ndodhi, pse nuk u raportua ngjarja”, u shpreh Çelmeta.
Ai shtoi se nga ekspertiza paraprake mjeko-ligjore është vërtetuar se i ndjeri është dhunuar, nga pamjet filmike duken veprimet e dhunshme të 29-vjeçarit Meçe ndaj 42-vjeçarit.
“Policia ende nuk na ka dhënë arsyen e krimit, çfarë ka ndodhur, a është kërcënuar më parë viktima nga autori?
Autori i arrestuar i dyshuar për krimin njihet si personazh problematik, por për shkak se një i afërm i tij ka pushtet politik, ka dyshime se ka pasur një tentativë për të fshehur ngjarjen.
Rreth 5 orë e 30 minuta pasi ka ndodhur ngjarja, Policia ka shoqëruar autorin e dyshuar, më pas janë shoqëruar edhe 3 persona të tjerë, ku njëri prej tyre është thyer para grupit hetimor dhe ka treguar”, tha Çelmeta për “News 24”.
Ai u shpreh se dyshimet lidhur me policinë nisën pasi pse duhen kaq shumë kohë për të zbardhur ngjarjen, kur kamerat kanë fiksuar atë që ka ndodhur.
Referuar një dëshmie të dhënë nga motra e viktimës, Çelmeta tha se asaj iu tha se vëllai ndërroi jetë pasi ishte rrëzuar, gjë që nuk ishte e vërtetë.
Burimi
