Prezantimi i drejtuesve politikë në qarqe, Bardhi nga Lushnja: Qytetarët e ndershëm të Shqipërisë i kanë sytë nga PD!

Partia Demokratike ka nisur prezantimin e 12 drejtuesve politikë të qarqeve.
Në mungesë të kreut të partisë, Sali Berisha që tashmë është zyrtarisht i pandehur nga SPAK, prezantimi është bërë nga 2 të besuarit e tij, Noka dhe Paloka që Berisha gjithashtu i ka besuar dirigjimin e fushatës në mungesë të tij.
Drejtuesi i ri politik i Qarkut të Korçës, Ivi Kaso, zhvilloi një tur takimesh në pesë degët e PD-së, ku u prezantua me strukturat e opozitës. 
Ndërkohë, kreu i Grupit Parlamentar të PD-së Gazment Bardhi, ka postuar pamje nga takimi me strukturat e Partisë Demokratike në Lushnjë.
Bardhi tha në këtë takim se qytetarët e ndershëm të Shqipërisë i kanë sytë nga Partia Demokratike.
“Në Lushnje ku vijuam takimin prezantues me strukturat drejtuese të degës, ritheksova se qytetarët e ndershëm të Shqipërisë i kanë sytë nga Partia Demokratike dhe opozita. Është në dorën tonë të fitojmë besimin e tyre dhe të bëjmë realitet ndryshimin e shumëpritur. Gjeta si gjithmonë nga strukturat drejtuese të Degës gadishmërinë për të bërë më të mirën, të gjithë sëbashku, gjatë këtij rrugëtimi transformues për Lushnjen dhe Shqipërinë.
12 vjet janë mjaftueshëm për të kuptuar nëse një qeveri punon për veten apo për qytetarët. Tashmë është e provuar se qeveria e Edi Ramës po pasuron veten dhe po varfëron shqiptarët! Mjafton të shohim vetëm sjelljen e Edi Ramës ndaj sektorit të bujqësisë, që është e vetmja mundësi jetese edhe për mijëra familje në Bashkinë Lushnje, për të vërtetuar nevojën ulëritëse për ndryshim. Një Qeveri që ka braktisur qytetarin e zakonshëm, duhet braktisur përgjithmonë!”, shkruan Bardhi.
PD i zyrtarizoi më 4 shtator 12 drejtuesit politikë të saj. I pari që zbarkoi në terren ishte Ervin Salianji që iu besua drejtimi i Elbasanit, Tirana iu la Belind Këlliçit, Durrësi Oerd Bylykbashit, Shkodra Luçiano Boçit, Lezha Agron Gjekmarkajt, Fieri Bardhit, Korça Ivi Kasos, Kukësi Flamur Hoxhës, Gjirokastra Tritan Shehut, Vlora Bujar Leskajt ndërsa Berati e Dibra Eno Bozdos e Xhelal Mziut.
Burimi