Salvadorasi, Jorge “Mágico” González, futbollisti që Maradona e vlerësoi si të vetmin më të mirë se veten

Futbolli është një art që nuk matet vetëm me trofe dhe rekorde, por edhe me magjinë që një lojtar mund të sjellë në fushë. Disa lojtarë bëhen legjenda jo për atë që kanë fituar, por për atë që kanë dhuruar me talentin e tyre të pastër. Një prej tyre ishte Jorge “Mágico” González, një virtuoz i topit që magjepsi tifozët dhe vetë legjendat e futbollit.

Diego Maradona, një nga ikonat më të mëdha të sportit, e konsideronte atë një fenomen të vërtetë. Për të, i vetmi lojtar më i mirë se ai nuk ishte as Cruyff, as Pelé, por pikërisht “El Mágico”. Nëse González do të kishte lindur në Argjentinë apo Brazil, shumë besojnë se ai do të ishte renditur mes legjendave më të mëdha të historisë së futbollit.
Në vitin 1984, Barcelona e ftoi atë në një turne parasezonal në Shtetet e Bashkuara, duke parë në të një yll të pazakontë, plot me teknikë dhe talent të lindur. Ideja e bashkimit të “El Mágico”-s me Maradonën ishte intriguese, por përtej disa miqësoreve të luajtura, kjo dyshe e ëndrrave nuk u bë kurrë realitet. Arsyet? Stili i lirë i jetës së González-it dhe natyra e tij rebele e penguan atë të bënte hapin e madh drejt një kariere në klubet më të mëdha evropiane. Megjithatë, ai mbeti një legjendë e pashoqe për ata që patën fatin ta shihnin në veprim.
Përgatiti: Albert Vataj
Burimi