Sot votohet buxheti i vitit 2025, Berisha rikthehet pas 11 muajsh në Kuvend

Ditën e sotme priten diskutime të gjata në Kuvend për shkak se kalon për votim buxheti i vitit 2025 prej 8.2 mld eurosh, më i madhi në histori.
Pasi ka kaluar shqyrtimin dhe diskutimet në të gjitha komisionet parlamentare, tashmë buxheti do të miratohet nen për nen në Kuvend.
Në seancën që konsiderohet ndër më të rëndësishmet e aktivitetit parlamentar, rikthehet pas gati 1 viti mungese për shkak të arrestit shtëpiak kreu i Partisë Demokratike, Sali Berisha, i cili buxhetin prej 8.2 mld eurosh e ka konsideruar si draftin e vjedhjeve të mëdha.
“Mosbindja civile në emër të fitores mund të vazhdojë gjer ditën e zgjedhjeve, ditën para zgjedhjeve. Të harrojë kush se ajo ndërpritet pa firmosur opozita fitoren e merituar. Beteja është betejë. Nëse Edi Rama nuk krijon qeverinë teknike, atëherë të përballet me mosbindjen civile. Le t’i marrë, t’i emërojë këta banditë që ka, se këta që ka emëruar janë të gjithë ushtarë të bandave, por t’i nxjerrë nga kthinat ku rrinë ata dhe t’i sjellë nëpër komisariate. Forcë në botë që ndalon PD-në nuk ka! Edi Rama është e shkuara, e shkuara e zezë e këtij vendi”, u shpreh ndër të tjera dje Berisha.
kreu i PD-së nënvizoi se duhet të caktohet minimumi jetik prej 200 eurosh, ndërsa premtoi se rroga minimale do të jetë 500 euro.
“Në buxhetin e parë të PD, minimumin jetik, 200 euro si fillim dhe është 3 herë më i vogël se në Itali. Mbi këtë minimum jetik do të rriten pensionet me 20%, me objektiv dyfishimin e tyre, do të rriten rrogat minimale. Rroga minimale do të jetë 500 euro dhe nuk do të ketë pagë nën 500 euro, pavarësisht nga efektet që mund të më thotë kush se do ketë në punësime e të tjera me radhë. Rroga mesatare do të jetë 1200 euro, rroga maksimale nuk do të lëvizë, jo”, tha Berisha.
Burimi