Salianji para ekzekutimit të vendimit politik: Nuk do ja dalin të na mbyllin gojën, bashkë çdo ditë dhe më të fortë

Deputeti demokrat Ervin Salianji ka shpërndarë një mesazh në rrjetet e tij sociale teksa shprehet se pret vendimin politik të burgosjes me urdhër të Edi Ramës.
Salianji shpreh falënderime për solidaritetin karshi tij, ndërsa shton se ky moment, edhe pse i vështirë, nuk do ta ndalojë në betejën për një Shqipëri më të mirë.
“Jam mirënjohës pa fund nga mbështetja juaj, nga solidariteti me praninë, me telefonatat e mesazhet. Ky është një moment i vështirë për shtetin e së drejtës e sundimin e ligjit, për demokracinë, për të gjithë ata, mijëra burra e gra, të rinj e të reja me të cilët kemi bërë një udhëtim pa kushte në këto vite të vështira të përballjes me qeverisjen e keqe, arbitrare, të dhunshme, të korruptuar, të lidhur me krimin. Po duhet t’ju them se asgjë, asgjë nuk është mbyllur. Është një përpjekje e ulët nën brez e tyre, që nuk do na ndalojë, nuk do na shkurajojë në përpjekjen tonë të madhe për një Shqipëri më të mirë”, shkruan deputeti.
Më tej, Salianji shprehet se Rama, produkt i krimit i bandave, nuk do t’ja arrijë të vendosë si normë mbylljen e gojës.
“Teksa sot po bëhen gati të zbatojnë urdhrin e Edi Ramës, vendimin e tij për të më izoluar, dhe të çojnë deri në fund përndjekjen politike, ata kurrë nuk do ja dalin të vendosin si normë se denoncimi i krimit, qenka faj. Nuk do ja dalin kurrë ta vendosin rend, heshtjen e mbylljen e gojës. Dhe për këtë garancia e madhe jeni ju, demokratët e guximshëm, qytetarët e lirë që më keni mbështetur në gjithë këto vite.
E vërteta do na bëjë më të mirë. Dhe e vërteta që po sulmohet, po goditet, po burgoset sot është se Edi Rama është produkt i krimit i bandave.  Sepse bëri Ministër të Brendshëm hetuesin e komunizmit dhe lidhjen mes bandave dhe tij, sepse përdori çdo institucion për ta mbrojtur e manipuluar çështjen. Sepse korrupsioni është i shtrirë ngado. Sepse me para të pista e me banditë ai blen vota e ruan pushtetit. E vërteta është se asnjë qeveri nuk ja del të qëndrojë gjithnjë në këto themele të kalbura”, shkruan deputeti.
Mesazhin e mbyll me një premtim për të vijuar betejën opozitare.
“Të dashur miq! Do të jemi bashkë çdo ditë dhe më të fortë. Do të jemi bashkë shumë shpejt e do punojmë me zemër e përkushtim për ta hequr këtë të keqe që i ka zënë rrugën vendit. Dhe do ja dalim. Falenderime”.
Të enjten, me një vendim që riktheu hijet e errëta të periudhës komuniste, Gjykata e Apelit dënoi me 1 burgim deputetin demokrat Ervin Salianji për kallëzim të rremë. Ndëshkimi politik duke përdorur drejtësinë erdhi vetëm sepse deputeti bëri detyrën dhe denoncoi publikisht se trafikanti Geron Xhafaj edhe pse ishte në kërkim nga autoritetet italiane, mbrohej nga vëllai ministër Agron Xhafaj, madje ishte ende aktiv në aktivitetit kriminal të trafikut të drogës.
Burimi