Protesta e 19-të para Bashkisë/ Bie agresiviteti, por rezistenca vijon. Çfarë ndodhi (Video-Foto)

Protesta e 19-të para Bashkisë së Tiranës u zhvillua këtë të enjte, me protestuesit që kërkuan dorëheqjen dhe arrestimin e kryebashkiakut Erion Veliajt.
Protesta e sotme zgjati më pak se një orë. Skenari ishte i ngjashëm me tubimet paraardhëse – me protestuesit që dhanë mesazhet e tyre me pankrata, thirrje dhe fjalime nga podiumi i krijuar rishtas.
Pamje nga protesta e sotme (1 Gusht 2024)
Protestat para bashkisë të organizuara nga opozita nisën pas arrestimit të drejtorëve të Erion Veliajt për procedimin penal të njohur si “5D”. Kryebashkiaku cilësohet “koka e bandës së drejtorëve hajdutë” dhe “pronari faktik i inceneratorit të Tiranës”. Protestat e para ishin më të ashpra krahasuar me ato të zhvilluara së fundmi – e që u karakterizuan nga përplasjet me policinë, hedhjen e molotovëve, apo djegien e gomave.
Akte që janë parë më pak së fundmi në sheshin para bashkisë, ku tubuesit janë kufizuar me gjuajte me vezë drejt fasadës së godinës.
Pamje nga protesta e sotme (1 Gusht 2024)
Pavarësisht inidcieve se ka përgjegjësi penale si në rastin e inceneratorit të Tiranës ashtu dhe procedimin penal “5D”, kryebashkiaku i Tiranës Erion Veliaj nuk është marrë asnjëherë i pandehur nga Prokuroria e Posaçme, që po heton çështjet. Kjo ka sjellë akuza gjatë tubimeve kundërt Strukturës së Posaçme se po amniston kryebashkiakun.
Akuza që u përsëritën edhe në tubimin e kësaj të enjteje.
Pamje nga protesta e sotme (1 Gusht 2024)
“100 për qind të fondeve shkojnë në xhepat e disa njerëzve për një vepër imagjinare, ne duhet të ndërtojmë një pllakë përkujtimore ku të vendosim emrin e Erion Veliajt dhe Spakistëve të tij tek mali i plehrave të padjegura të Tiranës. Aty e meritojnë ta kenë emrin. Dhe inceneratorin inekzistent të Tiranës do ta shpallim monument të kulturës se korrupsionit në këtë vend. Ai model që nuk duhet të ndiqet kurrë nga askush”, tha këshilltarja demokrate Ilda Zhulali.
Ajo paralajmëroi një tjetër dramë sociale si pasojë e një projekti të trumbetuar nga kryebashkiaku Veliaj dhe kryeministri Edi Rama për rehabilitimin e lumit të Lanës.
“Sot Tirana pati edhe një lajm të ri që na e solli në vëmendje Erion Veliaj dhe Edi Rama, Si do të transformohet lumi i Lanës. Projekti thoshte se do të këtë disa banesa për qytetarët e Tiranës. Në fakt ajo që do të thotë është se 300 familje dhe më shumë do të hiqen nga shtëpitë e tyre në mënyrë të dhunshme, brutale, me gaz lotsjellës. Nuk do t’u jepen letrat e shtëpive të tyre. Sa herë që këtë thonë zhvillim dhe transformim kanë parasysh vjedhjen dhe shkatërrimin. Ne nuk do ta lejojmë këtë. Ne do ta vazhdojmë të qëndrojmë këtu, ne jemi monumenti i luftës kundër korrupsionit në këtë qytet. Dhe Erion Veliaj nuk do gjejë qetësi deri sa të përfundoje përpara drejtësisë”, tha.
Pamje nga protesta e sotme (1 Gusht 2024)
Këshilltari i PL-së Tedi Blushi theksoi se ”sot mund të thuhet se Erion Veliaj, Edi Rama bashkë me SPAK janë si mishi me thoin, ata janë partenerë në krim dhe në vjedhje.
“Çfarë e pengon sot SPAK-un për të ndaluar dhe për të marrë të pandehur Erion Veliajn? Është vetëm një arsye, ata janë partnerë në krim dhe në vjedhje, sepse ata nuk po godasin korrupsionin dhe nuk po i japin fund pandëshkueshmërisë në nivelet më të larta, por thjesht bëjnë një show, duke arrestuar disa drejtorë…”, shtoi.
“Dumani bën presion me pseudo prokurorët për çdo njeri që denoncon inceneratorin. Është buka e Dumanit dhe krimit të organizuar të Veliajt dhe fatkeqësia e qytetarëve të Tiranës. Po u ikin paratë qytetarëve, kanë më pak para në xhep se i kanë marrë Rama, Veliaj e Xhaçka”, tha Klevis Balliu nga Partia Demokratike.
Pamje nga protesta e sotme (1 Gusht 2024)
Adriana Kalaja anga Aleanca për Mbrojtjen e Teatrit theksoi se ‘nëse Altin Dushmani ka ndonjë mundësi për të treguar se ne e kemi gabim, të veprojë, të arrestojë të parin Erion Veliajn, që i ka shkuar shkresa që në qershor”.
“Por Irena me tre mbiemra e ka amnistuar Erion Veliajn dhe të gjithë grupin kriminal të inceneratorëve. Ne kemi provuar se koha na ka dhënë të drejtë për të gjitha akuzat tona. Do të jemi këtu sërish, do jemi këtu çdo javë, nuk do na ndërpresë askush për të kërkuar arrestimin e Erion Veliajt dhe lirimin e liderit tonë, Sali Berisha”, shtoi ajo, duke lajmëruar vijimin e protestave.
Burimi