Pro-serbët në qeverinë e Malit të Zi do të tentojnë ta anulojnë njohjen e Kosovës
Profesori i Fakultetit të Shkencave Politike në Podgoricë dhe kryetar i Bordit të Drejtorëve të Qendrës për Monitorim dhe Hulumtim, Zllatko Vujoviq, ka paralajmëruar se partitë politike pro-serbe që kanë hyrë së fundmi në qeverinë e Malit të Zi mund të përpiqen të tërheqin njohjen e Kosovës nëse mbeten në pushtet për një kohë të gjatë.
Në një intervistë për “Kosovo online” Vujoviq theksoi se përfaqësuesit e këtyre partive mund të përpiqen të ulin nivelin e marrëdhënieve me Kosovën dhe t’i rikthejnë ato në minimum kudo që të jetë e mundur.
Ai tha se qeveria e tanishme e Malit të Zi, e cila është e dominuar nga partitë pro-serbe dhe pro-ruse, ka një qëndrim negativ ndaj Kosovës dhe pavarësisë së saj, dhe nuk është e interesuar për marrëdhënie të mira fqinjësore me Kosovën.
Sipas Vujoviqit, edhe pse është e vështirë të tërhiqet njohja e Kosovës për shkak të presionit perëndimor, kjo mund të ndodhë në të ardhmen nëse situata e integrimeve evropiane të Malit të Zi përkeqësohet.
Ai shtoi se presioni nga Beogradi për të ndaluar hyrjen e Malit të Zi në BE është një faktor i rëndësishëm në këtë çështje.
Vujoviq gjithashtu theksoi se nëse perspektiva e integrimit evropian bëhet e pamundur, atëherë koalicioni qeverisës në Mal të Zi mund të mos ketë asnjë motiv për të mbajtur marrëdhëniet me Kosovën, dhe nuk duhet të përjashtohet mundësia e tërheqjes së njohjes së Kosovës nga Mali i Zi.
Shtetet e Bashkuara të Amerikës dhe Bashkimi Evropian haptas kanë kundërshtuar me muaj përfshirjen e partive politike, që ata i cilësojnë anti-perëndimore, në koalicionin qeverisës të Malit të Zi.
Mali i Zi konsiderohej si një vend që udhëhiqte në procesin e anëtarësimit në Bashkimin Evropian në rajon dhe ka hapur të gjithë kapitujt në negociatat për anëtarësim.
Megjithatë, si pasojë e krizës politike dhe institucionale, nuk ka pasur asnjë konferencë ndërqeveritare që nga dhjetori i vitit 2021, për shkak të përparimit të pamjaftueshëm në reformat e nevojshme për procesin e anëtarësimit.
gijotina.com/
Burimi
