Njoftimi i SPAK: 21 masa sigurie për organizatë kriminale, mes tyre një zyrtar i lartë policie, një ish-gjyqtar dhe dy gazetarë

Prokuroria e Posaçme njoftoi caktimin e 21 masave të sigurisë në kuadër të një hetimi ndaj një organizate kriminale, pa dhënë detaje të tjera. Mes personave në hetim edhe një zyrtar i lartë policie, një ish-gjyqtar dhe dy gazetarë.
 
Përditësim – Gazetarët Artan Hoxha dhe Elton Qyno u fotografuan pasditen e së hënës teksa hynë në godinën e Prokurorisë së Posaçme në Tiranë dhe dolën gati një orë më vonë me dokumente në duar.
Sipas një njoftimi të Prokurorisë së Posaçme, Gjykata ka caktuar masën e sigurisë “detyrim për paraqitje” ndaj dy gazetarëve si dhe masa më të rënda sigurie ndaj 19 personave të tjerë, mes të cilëve anëtarë të një organizate kriminale, një zyrtar i lartë policie, një ish-gjyqtar dhe një avokat.
SPAK nuk sqaroi arsyet e hetimit ndaj dy gazetarëve dhe personave të tjerë, ndërsa deklaroi se të dhënat do t’i publikojë të martën.
“Me qëllim ruajtjen e integritetit të këtij operacioni, Prokuroria e Posaçme do të publikojë më shumë të dhëna rreth këtij hetimi ditën e nesërme,” tha SPAK në njoftim.
Gazetarët Hoxha dhe Qyno nuk ishin të arritshëm për koment. Përfaqësuesi ligjor i Qynos, Dorian Matlija tha se nuk mund të komentonte, pasi nuk ishte njohur ende me vendimin e caktimit të masës së sigurisë.
Gjatë dy viteve të fundit, Prokuroria e Posaçme ka ndërmarrë disa operacione kundër krimit të organizuar mbi bazën e një sasie të madhe komunikimesh të siguruara nga deshifrimi i aplikacionit Sky ECC.
SPAK bëri me dije se edhe operacioni i fundit ishte ndërmarrë në kuadër të një hetimi të një organizate kriminale me shtrirje ndërkombëtare dhe se ishte mbështetur nga Europol dhe agjencitë e tjera ligjzbatuese shqiptare dhe evropiane.
Njoftimi i SPAK: 
‘Në kuadër te hetimit të një organizate kriminale me shtrirje ndërkombëtare, me kërkesë të Prokurorisë se Posaçme, Gjykata e Posaçme e Shkalles së Parë për Korrupsionin dhe Krimin e Organizuar ka caktuar masat e sigurisë për 21 persona, ku përfshihen anëtarët e  organizatës kriminale, një zyrtar i lartë policie, një gjyqtar në detyre gjatë kryerjes së aktivitetit kriminal, një avokat dhe dy gazetarë.
Masat e caktuara të sigurisë janë si më poshtë:
Arrest me burg –  18 persona (përfshire ish gjyqtarin dhe zyrtarin e lartë të policisë së shtetit);
Arrest në shtëpi –  1 avokat;
Detyrim paraqitje në policinë gjyqësore –  2 gazetarë
Operacioni për ekzekutimin e masave të sigurisë i cili po mbështetet nga Europol dhe agjencitë e tjera ligjzbatuese shqiptare dhe evropiane, është në vijim.  
Me qëllim ruajtjen e integritetit të këtij operacioni, Prokuroria e Posaçme do të publikojë më shumë të dhëna rreth këtij hetimi ditën e nesërme.
Në foto: Gazetarët Artan Hoxha dhe Elton Qyno të hënën më 25 nëntor 2024 në SPAK. Foto: LSA.
 
Burimi