Po shkonte të niste shërbimin, përplaset në vija të bardha polici në Shkodër

Një aksident që ka lënë të plagosur një efektiv policie është regjistruar mbrëmjen e djeshme në qytetin e Shkodrës. Blutë e Shkodrës bëjnë me dije se efektivi është përplasur nga një automjet teksa po kalonte vijat e bardha dhe ishte duke shkuar për të nisur punën. “Rreth orës 21:00, në lagjen “Partizani”, një shtetas duke drejtuar automjetin e tij, dyshohet se ka humbur kontrollin mbi drejtimin e automjetit dhe si pasojë, ka përplasur shtetasin 60 vjeç, punonjës policie, i cili ishte duke kaluar në vijat e bardha për të shkuar për të marrë shërbimin”, sqaron policia. Punonjësi i policisë ndodhet nën kujdesin e mjekëve, jashtë rrezikut për jetën, ndërsa grupi hetimor po punon për zbardhjen e rrethanave të aksidentit.