Zjarr në fshatin Mengaj në Kavajë, kërkohet ndërhyrja nga ajri

Zjarri në Mengaj

TIRANË- Një vatër zjarri është aktivizuar në fshatin Mengaj në Kavajë. Zjarrfikësit kanë hasur vështirësi në shuarjen e flakëve dhe kanë kërkuar ndërhyrje nga ajri për shkak të terrenit të vështirë
Ministria e Mbrojtjes tha se zjarri përfshiu tre hektarë pyje me shkurre të thata. Gjatë orëve të para të mëngjesit, autoritetet bënë të mundur izolimin e një pjesë të zjarrit në krahun ku rrezikoheshin banesat.
“Për shkak të dendësisë së pyllit me shkurre të thata, ka qenë i pamundur depërtimi i forcave këmbësore. Zjarri ka përfshirë dy deri në tre hektarë sipërfaqe toke. Pas ndërhyrjes së forcave zjarrfikëse të bashkive Tiranë dhe Kamëz, është bërë e mundur, në orët e para të mëngjesit të sotëm, izolimi i një pjesë të zjarrit në krahun ku rrezikoheshin banesat.
Gjatë natës, në vendngjarje, ka qenë i pranishëm edhe prefekti i qarkut Tiranë Afrim Qendro, i cili pa edhe situatën nga afër.
Për shkak të pamundësisë së ndërhyrjes së automjeteve, si pasojë e thellësisë së zonës së zjarrit dhe terrenit të vështirë, flakët kaluan kodrën duke përfshirë edhe një pjesë të fshatit Cikallesh të komunës Helmës në Kavajë.
Në këto kushte u kërkua mbështetja për ndërhyrje nga ajri dhe, pas marrjes së informacionit, helikopteri i Forcës Ajrore “Cougar” u nis në operacion”, njofton Ministria e Mbrojtjes. /ZËRI
Burimi