Capello pranon diferencën e madhe mes Spanjës dhe Italisë: Tek ne nuk kultivohet më futbolli cilësor

Në edicionin e sotëm të “Gazzetta dello Sport”, Fabio Capello ka analizuar humbjen e Italisë ndaj Spanjës: “Ishte një paraqitje e keqe kundër Spanjës, por ne mund të rikthehemi. Kualifikimi për në 1/8 finale është aty.
Kroacia do të na ofrojë mundësinë për shpagim të hënën. Misioni është brenda mundësive tona, përderisa mbajmë parasysh disa koncepte që dolën nga disfata në Gelsenkirchen. Në vendin tonë nuk kultivohet më cilësia. Në shkollat tona të futbollit mësohen taktikat, por jo teknika dhe ky është rezultati afatgjatë.
Kam stërvitur në Madrid, e di mirë mënyrën se si mësohet dhe përjetohet futbolli në Spanjë. Momenti më i mirë i stërvitjes është ritmi, saktësia në pasime, jo sepse bën shaka dhe relaksohesh.
Sfida atje është të bësh sa më pak gabime dhe të perfeksionosh rregullat e teknikës. Në Itali, vitet e fundit, shumë e kanë marrë Guardiolën si model, por Guardiolën e dhjetë viteve më parë, ndërsa vetë Pep po evoluonte dhe shikonte përpara.
Keqkuptimi ka çuar në situatën e sotme. Lojtarët tanë pothuajse kurrë nuk e marrin përgjegjësinë për ta luajtur topin përpara, ose për të rrezikuar me një driblim. Ne përfunduam duke ngatërruar lojën e mirë me posedimin steril të topit.
Loja e mirë, megjithatë, është ajo e Spanjës aktuale, ja modeli që duhet ndjekur. Një model në të cilin Nico Williams, në moshën 21-vjeçare, shpjegon se si gjithmonë synohet të driblohet kundërshtari”.
Burimi