Tag: Kukës

Elmas Bogdani
Ish-kryeministri Sali Berisha dhe dhëndri i tij, Jamarbër Malltezi tashmë do të ulen në bankën e të akuzuarve për t’u përballur me drejtësinë për aferën korruptive të Partizanit. Gazeta “SOT” disponon dosjen 500 faqe të SPAK dhe sot do të nxjerrim provat që pritet të tronditin nga themelet familjen “Berisha”. Flitet për transaksione, prona, dhe emërime postesh për zyrtarë e ish-zyrtarë të PD që kanë qenë njëkohësisht punonjës në bizneset e Jamarbër dhe Argita Malltezit. SPAK ka prova për Berishën se ka ndërmarrë ndryshime ligjore në përfitim të dhëndrit të tij, Jamarbër Malltezi duke i mundësuar këtij të fundit që të ndërtonte biznesin e një kompanie nga e cila përfitoi të paktën 5.4 milionë euro. Kjo dosje nxjerr zbuluar edhe të gjithë bashkëpunëtorët e kreut demokrat që janë vënë në rresht për të mbyllur me sukses aferën e tij. Aty dalin zëvendësministrat Anton Gurakuqi, Ekrem Spahia, ish-ministrat Ylli Pango, Fatmir Mediu, Genc Ruli dhe Gazment Oketa, si dhe Justina Boriçi, ish-presidenti Bamir Topi, Oerd Bylykbashi, Ilir Kadia, Xhemal Gjunkshi, apo edhe Arben Imami. Gjithashtu del dhe emri i kryeministrit Rama, por edhe skandale të tjera me serbin Fazlliç dhe apartamente te Bashkim Ulaj pa iu gjendur pagesat.
Si u vunë në rresht ministrat nga Berisha?
Prokuroria e Posaçme pretendon se Berisha ka bërë ndryshime në ligj që të favorizojë dhëndrin e tij, duke filluar me ndryshimin e destinacionit të pronës nga pronë sportive në pronë private. Shohim shkresa e dokumentacione, ku ministrat e Berishës janë përfshirë në një farë mënyre, që procedurat të përshpejtohen. Prova e SPAK është një procesverbal i mbledhjes së qeverisë së datës 18 qershor 2008. Aty është pasqyruar procesverbali i mbledhjes së qeverisë së asaj date. Në atë mbledhje, ishin të pranishëm zëvendësministrat Anton Gurakuqi dhe Ekrem Spahia.
Në mbledhjen e 18 qershorit 2008, do të duhej të diskutohej një propozim i ministrit Ylli Pango për një rishikim të ligjit nr. 9376 datë 21.04.2005 “Për Sportin”. Pango propozonte që objektet sportive mund tu jepen në koncesion apo pronësi të tretëve pa ndryshuar destinacion. Që do të thotë çdo objekt sportive, duhet të duhet të mbetet sportiv. Por në mbledhjen e qeverisë, Sali Berisha, tregon hapur se është i xhindosur nga propozimi i Ylli Pangos dhe i vërvitet pa mëshirë Ekrem Spahisë. Berisha, është i tërbuar nga ideja se një ministër i tij po i del kundër privatizimit të Klubit Partizani. Në dosjen e SPAK është dialogu ndërmjet Ekrem Spahisë dhe Sali Berishës, që në fakt është një presion i hapur, jo për veshët e një zv/ministri pa peshë dhe pa fuqi, por për të gjithë ata politikanë të PD-së që i kundërvihen vullnetit të familjes Berisha.
Madje, kryeministri thotë qartë se jo vetëm klubi Partizani do të duhet të privatizohet, por edhe stadiumet e terrenet e tjera sportive. Të faksimilet e dosjes së SPAK janë të gjitha diskutimet në mbledhjen e qeverisë të 16 qershorit 2008. Berisha thotë në mbledhje, duke akuzuar Ylli Pangon për lobing ndaj Presidentëve të klubeve të futbollit, se nëse ka procedura të sakta nuk ekziston asnjë terren sportive në Tiranë. Dhe përmend në fillim Stadiumin “Qemal Stafa”, “klubin Partizani” dhe kubin “Dinamo”. “Nuk ekzistojnë stadiume në Tiranë, po të isha unë kryetar bashkie, e po e bëri ai e përgëzoj. Stadiumet nuk duhet në mes të qytetit, duhet të dalin anash”, thekson Sali Berisha.
Skandali
Vetëm nëse shikon procesverbalin e qeverisë shikon qartë se Sali Berisha ju bën të ditur çdo ministri se nuk duhet të pengojnë vullnetin e familjes së tij. Në mbledhjen e qeverisë së 16 qershorit, qeveria vendos ndryshimet në ligjin për Sportin, duke lejuar që kur ka pronar objektet sportive u jepet atyre, duke u lënë dorë të lirë që të ndryshojnë destinacionin, ndërkohë nëse jepen në koncension, nuk duhet të ndryshohet destinacioni, pra prona duhet të përdoret si terren sportiv. Projektligji miratohet më 21 korrik 2008 dhe hyn në fuqi më 16 gusht 2008. Ylli Pango, ministër i Kulturës i kohës, kur është pyetur nga SPAK, ka deklaruar se privatizimi i objekteve sportive ka ardhur si rrjedhojë i një kërkese të kryeministrit që ministritë e linjës të përgatisin aktet.
Përfshirja e Mediut dhe Rulit
Pak ditë pasi mori pushtetin Sali Berisha, ministri i Mbrojtjes Fatmir Mediu dhe ai i Ekonomisë Genc Ruli filluan procedurat e privatizimi në kohë rekord. Një hap i rëndësishëm ishte kalimi në qeveri i ndryshimeve në ligjin për kthimin dhe kompensimin e pronës, duke e vendosur këtë strukturë nën kontrollin e plotë të Kryeministrit Berisha dhe duke ndryshuar disa kushtet për privatizime. Mes te tjera ndryshoi neni 6, në këtë mënyrë: Subjekteve të shpronësuara u kthehen të gjitha pronat e paluajtshme në pronësi apo përdorim të Ministrisë së Mbrojtjes, por që janë jashtë strukturës së Forcave të Armatosura, dhe në çdo veprimtari tjetër të institucioneve të ndryshme shtetërore, por që janë jashtë destinacionit të veprimtarisë së tyre.
Më 17 korrik 2006, Këshilli i Ministrave nën drejtimin e Sali Berishës propozoi sërish ndryshimin e ligjit për kthimin dhe kompensimin e pronës dhe ndryshoi varësinë e Komitetit Shtetëror për Kthimin dhe Kompensimin e Pronave dhe krijoi Agjencinë e Kthimit dhe Kompensimit të Pronave. Me mekanizma ligjorë Berisha ia mori Kuvendit dhe e vuri nën varësinë e Këshillit të Ministrave, pra në varësinë e tij direkte. Edhe Organika, drejtuesit dhe struktura e AKKP-së përcaktohen me urdhër të kryeministrit me propozimin e Ministrit të Drejtësisë dhe ishin totalisht në varësinë e Berishës. Sapo Berisha kishte përfunduar struktura e AKKP, 5 familjet me në krye Jamarbër Malltezin kanë paraqitur kërkesën për kthimi i pronës. “Pse nuk e kanë bërë kërkesën më përpara?’’ shkruan SPAK në dosje.
Emri i Justina Boriçit
Procedurat e privatizimit të ish kompleksit Partizani, është bërë nga AKKP dhe është vendosur kthimi i pronave për 4 familje brenda një afat një vjeçare. Titullarja e parë që shqyrtoi dosjen, ka qenë Justina Boriçi e cila ka përmendur Sali Berishën në dëshminë e saj në SPAK dhe thotë se e ka takuar personalisht Berishën, ndërsa të gjitha emërimit vinin nga Kryeministria. Punonjësit i bënë lëvizje me shpejtësi duke caktuar me urdhër ‘’dosje Partizanin’’ si dosjen e parë që duhet të shqyrtohet, dhe pa respektuar procedurat, me akt ekspertime fiktive, procedura të pandjekura sipas parashikimeve ligjore dhe duke anashkaluar mijëra dosje te pronarëve të tjerë që ishin në pritje për të shqyrtuar. Me të njëjtat shkelje është konstatuar edhe një tjetër institucion, ZVRPP. Sipas SPAK zyrtarë të tij kanë shkelur ligjet dhe procedurat, ndërsa edhe këtu ata që janë marrë me procedurat kanë rezultuar të njohur apo në lidhje interesi me Malltezin, Bektashin apo Begejan.
Firma e Edi Ramës
Një tjetër institucion që u vendos në dispozicion të Berishës dhe privatizimit të Partizanit ishte KRRTRSH. Me vendimin e firmosur më 21 Nëntor 2006 miratohet ndryshimi i planit rregullues të Qytetit të Tiranës në lidhje me zonimin funksional për disa zona të qytetit” ku përfshihet dhe zona me sipërfaqe 0.7 ha në Rrugën “Frosina Plaku”, e cila ndryshohet nga “zonë sportive” në “zonë banimi”. Vendim i cili do të mundësonte ndërtimin në atë zonë. E gjithë kjo u konkretizua me miratimin në të njëjtin institucion të planin vendor të Tiranës më 15 shkurt 2013. SPAK sqaron shumë mirë procedurën e ndryshimit të destinacionit që ka përfshirë fillimisht komitetin teknik te Bashkia në kohën kur kryebashkiak ishte Edi Rama, pastaj KRRT e Tiranës ku shumica e kishte PD dhe në fund u implementua me firmë të Sali Berishës. Privatizimi i kompleksit Partizani pengohet edhe nga fakti që kjo pronë duhet të ishte në planin e përhapjes së ushtrisë sipas propozimi të Shefit të Shtabit të Përgjithshëm. Por ky status iu hoq pas një ndërhyrjeje të ministrit të Mbrojtjes.
Bamir Topi, Bylykbashi, Gjunkshi, Oketa dhe Ilir Kadia
Por jo të gjithë iu bindën Sali Berishës në këtë rrugë. Vladimir Qirjazi, në atë kohë gjeneral brigade, Komandant i Komandës Mbështetëse në Forcat e Armatosura, i rezistoi 3 vite privatizimit të ish kompleksit Partizani, të cilin e konsideronte në shkelje të ligjit dhe refuzonte të nënshkruante. Por si e zgjidhi Berisha një ‘problem’ të tillë? Me firmë të Sali Berishës nxirret urdhri i datës 16 prill 2009 për t’i ushtruar kontroll Qirjazit nga Drejtoria antikorrupsion në Kryeministri që drejtohej në atë kohë nga Oerd Bylykbashi. Dhe pikërisht Bylykbashi i dërgon Qirjazit ta inspektojë Ilir Kadiu, një prej pronarëve të pronës në konflikt total interesi, së bashku me një inspektor tjetër, të cilët përpilojnë aktin e inspektimit dhe ngarkojnë me përgjegjësi Vladimir Qirjazin dhe kërkojnë masa disiplinore.
Por Qirjazi reziston, edhe pasi në zyrë e kishte thirrur ministri Gazmend Oketa, i cili i kishte thënë ‘duhet të firmoset, ma kërkojnë edhe mua’. Me dekret të Presidentit Topi nr. 6231, datë 2 shtator 2009, Qirjazi shkarkohet dhe në vend të tij me dekret 6291 datë 7 tetor 2009 emërohet në pozicionin e Komandantit të Komandës Mbështetëse, gjeneral Xhemal Gjunkshi. Gjunkshi i gatshëm për t’u bindur urdhrave dhe për të nënshkruar menjëherë dhe pa asnjë kundërshtim merr gjithçka në dorë. Në vetëm 24 orë bën plot 5 veprime. Vetëm një javë pas emërimit, më datë 15 tetor 2009, ministri i atëhershëm i Mbrojtjes Arben Imami autorizon Xhemal Gjunkshin si kompetent për shitjen e pronës. Pa kaluar 24 orë, Gjunkshi kalon të gjitha procedurat që ishin të pamundura të kryheshin prej 3 vitesh nga Qirjazi. Dhe me veprimet me urgjencë të Gjunkshit, tashmë pengesat kishin marrë fund dhe Partizani mund të merrej nga Malltezi, i cili ndërtoi dhe siguroi miliona euro për të gjithë familjen.
Damir Fazlliç
Damir Fazlliç është gjithashtu një prej emrave më të njohur, klientë të familjes Berisha, që përmendet në dosjen e SPAK për aferën Partizani. Marrëdhënia e Argita Malltezit me Damir Fazlliç është një nga pikat në akti akuzën 500 faqe të SPAK. Prokuroria e Posçme në dosje evidenton faktin se në vitin 2007 rezulton se Jamarbër Malltezi nis blerjen e disa tokave në Porto Romano. Në muajt korrik-gusht 2007, ai arrin të bëhet pronar i një sipërfaqeje toke arë prej 3885 m2 të blerë në vlerën e rreth 19 milionë lekë. Këtë tokë ai ia shet brenda muajit shtator 2007, pra vetëm një muaj më vonë, shoqërisë Alpha me ortak të vetin dhe administrator shtetasin serb Damir Fazlliç, kundrejt një çmimi shumë herë më të lartë, konkretisht 396 235 euro.
Shoqëria Alpha e Fazlliç krijohet në muajin maj 2007 dhe ekspert kontabël caktohet Shpresa Breçani, mbesa e ish-kryeministrit Sali Berisha që ka ndjekur edhe aspekti financiar të privatizimit të Klubit Partizan. Fazlliç, shkruan SPAK në dosjen e njihte Argita Malltezin prej kohësh. Disa muaj pas shitjes së tokës, në 23 prill 2008, nënshkruar nga Ministri i METE Genc Ruli dhe kryeministri i asaj kohe Sali Berisha, është miratuar studimi “Zhvillimi i integruar në sinergji i zonës energjetike dhe industriale të Porto Romanos, Durrës.” Nisur nga të dhënat që dispononin – thekson SPAK –ortakja e Argita Malltezit Flutura Kola dhe bashkëshorti i saj Florenc, si dhe Jamarbër e Argita Malltezi, duke qenë në dijeni të zhvillimit që do të pësonin pronat e ndodhura në vendin e quajtur fshati Rinia, kanë vendosur të blejnë toka nga pronarët dhe t’ia shesin më pas Damir Fazlliç.
Pra Berisha, në cilësinë e Kryeministrit i jepte koncesionet e pasurive të shqiptarëve, në sintoni të plotë me interesat e familjes së tij. Ata i mësonin më herët këto kontrata shtetërore dhe bënin lëvizjet e duhura për t’u pasuruar shpejt me miliona. Është për t’u theksuar fakti se në akte përshkruhet se blerja e tokës bëhen dorazi ndërsa shitjet te Alpha bëhen me lekë në bankë. Pra një sistem perfekt për të pastruar paratë ‘Cash’ origjina e të cilave nuk dihet. Argita Malltezi evidentohet se ka nënshkruar kontratat e shitjes në drejtim të blerësit Damir Fazllic bashkë me bashkëshortin e saj, megjithëse nuk i deklaron në IDLKPKI këto transaksione.
Bashkim Ulaj
Një emër tjetër i përmendur në disa faqe të dosjes së SPAK për aferën Partizani është ai i Bashkim Ulajt. Në dosje paraqiten disa apartamente dhe pasuri të Jamarbër dhe Argita Malltezit që i kanë marrë nga kompania ndërtuese A.B.A.U e Bashkim Ulajt dhe familjarëve të tij. Pasuritë janë në pallatin në rrugën Mustafa Matohiti ka familja jeton edhe sot. SPAK flet për një apartament mbi 205 mijë euro, nga të cilat thotë se ndër vite nuk jepen të dhëna në deklarim se si dhe kur janë paguar këto para (faqe 410 te dosje). Edhe një apartamenti tjetër që i janë shtuar 35m2 tarracë Argita Malltezi nuk e ka deklaruar dhe SPAK ka konkluduar se nuk i kanë bërë ndonjë pagesë kompanive të Bashkim Ulajt (faqe 411).
Një tjetër pasuri që evidentohet në dosje është një garazh i marrë në vitin 2002, 10 mijë euro, për të cilin SPAK thotë se nuk është deklaruar nga Argita Malltezi dhe ndoshta nuk është paguar. SPAK rikujton se Bashkim Ulaj me kompaninë e tij GENER 2 ka marrë gjatë kohës që Berisha ishte Kryeministër një koncesion miniere në Fushë Krujë. SPAK evidenton edhe faktin se në apartamentin me tarracë në rrugën “Mustafa Matohiti” zhvendoset Sali dhe Liri Berisha në vitin 2007. Pra tarraca në të cilën bën ecje sot Sali Berisha nën arrest shtëpie, është e padeklaruar ndonjëherë në organe dhe nuk ka prova nëse janë bërë pagesa dhe mënyra se si janë bërë këto pagesa.
Ndrea Prendi
Në dosje përmendet edhe Ndrea Prendi, komandanti i Gardës së Republikës në një prej krimeve më të rënda që kanë ndodhur në këtë vend, 21 janarin e vitit 2011. Në faqet 404-405 të dosjes paraqitet një episod për një apartament të Jamarbër Malltezit në rrugën Lidhja e Prizrenit, e marrë nga Enti Kombëtar i Banesave në kohën kur ishte President Sali Berisha, në vitin 1996. Më pas është bërë shitja e tij po në EKB dhe është blerë një apartament 3+1. Në këtë pallat është bërë një shtesë 60 m2 për çdo apartament dhe mes banorëve të pallatit që kanë firmosur ka qenë edhe Ndrea Prendi pasi edhe ai kishte shtëpinë atje. Ka qenë pikërisht kjo arsyeja që ai është thirrur në SPAK korrikun e kaluar. Prendi ka thënë se nuk e mban mend firmën e tij por është përballur me një pyetje për disa çeqe për një vlerë totale prej 15.500 dollarësh, të firmosur nga Jamarber Malltezi që ka tërhequr mes viteve 2003-2005. Një nga këta ka citimin ‘’rregullim apartamenti’’. Për këtë Prendi ka thënë se merrte porosi nga Jamarbëri dhe i çonte lekët aty ku duhet të bënte pagesat. Pra, personi të cilin Berisha e kishte komandant garde në vitin 2011, nga armët e së cilës u vra 4 njerëz, vite më parë i shërbente dhëndrit të tij. (Faqe 404-405)
Safet Gjici
Një apartament i është shitur nga Argita Berisha dhe Jamabrer Malltezi një tjetër personazhi të njohur, Safet Gjicit, ish kryebashkiakut socialist të Kukësit, i dënuar me vendim të formës së prerë nga Apeli i GJKKO. Shitja i është bërë në vitin 2008 Gjicit. Kontrata e shitjes së pasurisë që çifti i familjes kryeministrore e kishte paguar Enti i Banesave vetëm 1.471.000 lekë (plus 20.000 dollarë për një shtesë 60 metra katrorë) u shit më 26 shkurt 2008 socialistit Gjici për 129,800 euro. Çifti Malltezi gjithashtu i shet Gjicit edhe shtesën e apartamentit, të ndërtuar më vonë, e cila ka hyrje më vete, me sipërfaqe prej 72 metër katrorë, në proces legalizimi. Por ajo që SPAK ka zbuluar është fakti se Argita Malltezi, pavarësisht se rezulton të ketë shitur apartamentin dhe shtesën në vitin 2008, ka vijuar të deklarojë përfitim qiraje për pasuri të ndodhura në rrugën Lidhja e Prizrenit deri në vitin 2012. Argita Malltezi, në deklaratën periodike vjetore, deklaron të ardhura për vitet 2008, 2010, 2011 nga qiraja e apartamentit në rrugën Lidhja e Prizrenit, në vlerën e 1170 euro në muaj. Shitjen e pasurisë apartament, sipas SPAK, Argita Malltezi e deklaron vetëm në vitin 2012.
SPAK “zbërthen” transaksionet e familjes Berisha
Nga ana tjetër, në lidhje me përfitimet financiare, Struktura e Posaçme thekson se Sali Berisha ka përfituar kryesisht përmes dhëndrit të tij, Jamarbër Malltezi. “Me qëllim ruajtjen e imazhit të një politikani që nuk është pasuruar asnjëherë, thotë SPAK, shtetasi Sali Berisha nuk do të rriste formalisht pasurinë e tij dhe ky përfitim do të kalonte tek shtetasi Jamarbër Malltezi”. Po sipas SPAK, aksesi në pasuritë e bashkëshortëve Malltezi është i përhershëm nga familja Berisha dhe jo thjeshtë shfrytëzim i pasurive të tyre për akomodim, por edhe përdorim i shumave monetare, në vlera që duke pasur parasysh nivelin ekonomik të një politikani shqiptar, vetëm në pagën e tij nuk justifikohen. Thuhet se Argita dhe bashkëshorti Jamarbër Malltezi fituan gati 6 milionë euro dhe një pjesë e mirë e kësaj shume i është kthyer familjes së Sali Berishës përmes pagesave të shpenzimeve. SPAK ka kryer verifikimin e deklarimit të pasurive nga ku rezulton se dhëndri dhe vajza prej 4 vitesh firmosin çeqet për të paguar shpenzimet e studiove ligjore për gjyqet e Sali Berishës me SHBA dhe Britaninë e Madhe pasi këta e shpallën ‘non grata’.
Faturat
Jo vetëm kaq, dhëndri është treguar ‘zemërgjerë’ për të paguar dhe shpenzimet shëndetësore në vlerën e 13 mijë eurove, për vjehrrin dhe vjehrrën. Gjithashtu ka qenë ‘zemërgjerë’ për të paguar dhe shpenzimet për kunatin, Shkëlzen Berisha në vlerën 52 mijë euro totali. Madje këtij të fundit i është paguar dhe fatura prej 27 439 USD për një avokat në Amerikë. Në dosjen e SPAK evidentohen përfitimet e familjes Berisha nga të ardhurat e familjes Malltezi sipas viteve. Në vitin 2014, familja e Sali Berishës ka marrë nga dhëndri i tij Jamabër Malltezi 24 000 euro. Sipas SPAK, 6 mijë euro janë dhënë për shpenzime shëndetësore për Liri Berishën. 18 000 euro hua pa interes për Shkëlzen Berishën, ‘shumë e cila deri më sot nuk dokumentohet të jetë shlyer)”, thuhet në dosjen e SPAK. Në vitin 2017 janë dhënë 27 439.98 USD dhe 7,403. euro. Sipas Prokurorisë së Posaçme, 7.400 euro janë shpenzime mjekësore për Sali Berishën. 27 439 USD është paguar avokati i Shkëlzen Berishës në Amerikë Jason Zolads, në USA, shumë kjo e pretenduar e dhënë pa interes, sipas vetëdeklarimit të djalit të Berishës.
Pushimet dhe gjyqet
Viti 2018: Sipas SPAK Malltezi ka paguar 3,000 euro pushime për vjehrrin Sali Berisha dhe bashkëshorten Liri Berisha. Viti 2021: Janë paguar gjithsej 19 933 euro. Sipas SPAK, 13,288 euro janë paguar nga Jamarbër Malltezi si shpenzime konsulence avokatie për zyrën ligjore në Francë për çështjen Antony Blinken. Bëhet fjalë për çështjen gjyqësore në Gjykatën Korreksionale të Parisit ku në gusht të 2021 ish kryeministri Berisha paditi për shpifje sekretarin amerikan të shtetit Antony Blinken. Ky i fundit në maj të 2021 e shpalli ‘non grata’ në SHBA Berishën dhe familjen e tij. Ndërsa pjesa tjetër, shuma prej 6.644 euro është paguar për Shkëlzen Berishën për të njëjtën çështje. Viti 2022: Argita Malltezi shleu faturat e studios ligjore në Mbretërinë e Bashkuar për babanë e saj, i cili u shpall non grata edhe nga Mbretëria e Bashkuar më 19 korrik 2022.
SPAK thotë se 72 mijë dollarë janë faturat e likuiduara për studion ligjore, pagesë e konfirmuar edhe sipas konfirmimeve bankare për ZAIËALLA And Co Limited.. Viti 2023: Janë 201,675.6 euro dhe 54,382.76 USD të paguara si likuidim të faturave të studios ligjore në Mbretërinë e Bashkuar në lidhje me gjyqin për babanë Sali Berisha. Ka gjithashtu disa pagesa nga Jamarbër Malltezi, por ato i kreditohen atij në llogari nga Argita Malltezi, konstaton SPAK. Ndërsa në vitin 2024 janë paguar 213,590 euro. Fatura këto të paguara nga Argita Malltezi për të likuiduar studion ligjore në UK (Mbretërinë e Bashkuar) në lidhje me gjyqin e nisur nga Sali Berisha.
Pagesat
Po ashtu, të njëjtën gjë ka bërë dhe Fatmir Bektashi, i cili jo vetëm ka dhënë para për fondacionin e Liri Berishës, por ka sponsorizuar dhe udhëtime këngëtarësh dhe të këshilltarëve të Berishës. “Unë u ndala në këtë koment, në aktakuzën e turpshme figurojnë dhe financimet e përbashkëta, që janë bërë për paditë gjyqësore nga familja jonë si dhe dhurata që Fatmir Bektashi i ka bërë fondacionit ‘Fëmijët shqiptarë’ për festën e Vitit të Ri. Rikujtoj këtu se ky biznesmen fisnik, së bashku me dy ortakët e tij, i kanë dhuruar qytetit të Tiranës kopshtin dhe çerdhen më moderne në tokën e tyre. Përveç kësaj, ky biznesmen paska sponsorizuar dhe ky është akt, sipas tyre korruptiv, në vitin 2013, një udhëtim të Rikardo Koçiantes, mentorit të këngëtares së njohur, asokohe vajzë e re shqiptare, Elhaida Dani, e cila nën instruksionet dhe mbështetjen e tij, fitoi ‘Voice of Italy’. Dhe me këtë rast, u ftua Rikardo bashkë me këngëtaren për t’u dekoruar nga Presidenti i Republikës. Po ashtu SPAK ka zbuluar se Fatmir Bektashi paska sponsorizuar një biletë të Flamur Kuçit në studion e Libeskindit. Flamur Kuçi ka qenë këshilltar i Berishës. Gjithashtu në dosje kanë dalë dhe apartamente të Malltezit jashtë Shqipërisë me vlera marramendëse lekësh.