‘Mund të na sulmojë dhe ne’, vendet e Gjirit kundër sulmit Izraelit mbi Iran

 Shtetet e Gjirit Persik janë duke lobuar në Uashington për të ndaluar Izraelin të sulmojë vendet e naftës të Iranit. Vendet e gjirit janë të shqetësuar se objektet e tyre të naftës mund të goditen nga përfaqësuesit e Teheranit nëse konflikti përshkallëzohet, thekson Reuters.
Si pjesë e përpjekjeve të tyre për të shmangur një luftë në shkallë të gjerë midis Iranit dhe Izraelit, shtetet e Gjirit, duke përfshirë Arabinë Saudite, Emiratet e Bashkuara Arabe dhe Katarin, po refuzojnë të lejojnë Izraelin të fluturojë mbi hapësirën e tyre ajrore për çdo sulm ndaj Iranit dhe ia kanë përcjellë këtë Uashingtonit, theksojnë burime qeveritare nga SHBA për Reuters.
Izraeli ka premtuar se Irani do të paguajë për sulmin e tij raketor javën e kaluar, ndërsa Teherani ka thënë se çdo hakmarrje do të përballet me shkatërrim të madh, duke rritur frikën për një luftë më të gjerë në rajon që mund të thithë Shtetet e Bashkuara.
Një sulm i mundshëm izraelit ishte fokusi i bisedimeve të mërkurën midis sundimtarit de fakto saudit, princit të kurorës Mohammed bin Salman dhe ministrit të Jashtëm iranian Abbas Araqchi, i cili ishte në një turne në vendet e Gjirit për të fituar mbështetje.
Sakaq, sulmet izraelite nuk kanë të ndalur në Liban. Një sulm izraelit vrau pesë punonjës të urgjencës në Libanin jugor, tha ministria e shëndetësisë, ndërsa Izraeli po shtynte ofensivën e tij të madhe kundër Hezbollahut të mbështetur nga Irani dhe paralajmëroi civilët libanezë në jug që të mos kthehen në shtëpi.
Kryeministri i përkohshëm i Libanit, Najib Mikati, tha se kontaktet ishin duke u zhvilluar midis Shteteve të Bashkuara dhe Francës me qëllim të ringjalljes së një armëpushimi, një referencë e dukshme ndaj përpjekjeve diplomatike për të arritur një armëpushim që Izraeli e hodhi poshtë muajin e kaluar. Nuk pati asnjë koment të menjëhershëm nga Uashingtoni apo Parisi. 
Burimi