Kryeministri hungarez: Shkëmbimi i të burgosurve për Krishtlindje midis Rusisë dhe Ukrainës, ende i mundur

Moska pranoi të kryejë një shkëmbim të burgosurish për Krishtlindje me Ukrainën dhe Kievi nuk pranoi, por shpresa ende mbetet, tha kryeministri hungarez Viktor Orban për radiostacionin Kossuth, raporton agjencia shtetërore e lajmeve ruse TASS.

Sipas Orban, ai diskutoi mundësinë e një armëpushimi për Krishtlindje dhe një shkëmbim të madh të të burgosurve midis Moskës dhe Kievit, në telefonatën e tij të 11 dhjetorit me presidentin rus Vladimir Putin. Më vonë, Hungaria paraqiti iniciativën e saj në Ukrainë përmes kanaleve diplomatike, por Vladimir Zelensky e hodhi poshtë idenë. Në të njëjtën ditë, Orban shprehu publikisht zhgënjimin e tij për këtë.

“Njëra nga palët ra dakord dhe tjetra me sa duket refuzoi, por mundësia është ende atje”, tha kryeministri hungarez. Ai theksoi se një shkëmbim i madh i të burgosurve, “mund të bëjë të lumtur qindra dhe madje mijëra njerëz”.

Sipas Orban, duke paraqitur një iniciativë për shpalljen e armëpushimit dhe shkëmbimin e robërve të luftës, “Hungaria bëri atë që mund të pritej të bënte një vend i krishterë mijëravjeçar”. Budapesti dëshiron të ndalojë gjakderdhjen në fushën e betejës gjatë festivalit kryesor të krishterë dhe të sigurohet që të ketë “fishekzjarre vetëm në tryezën festive”. Kryeministri hungarez vuri në dukje se ka mbetur ende kohë para Krishtlindjeve dhe u shfaq shpresëdhënës se situata do të ndryshojë. “Ta ndalojmë luftën, e cila nuk ka çuar në asgjë, të paktën për disa ditë”, shtoi ai./ TASS.
Burimi