Gjermania drejt zgjedhjeve të parakohshme, Komisioni Zgjedhor: Na mungon letra…

Drejtuesit e industrisë së letrës në Gjermani kanë kundërshtuar pretendimet e komisionit kombëtar zgjedhor se mungesa e letrës mund të pengojë kohën e zgjedhjeve të parakohshme në vend.

“Ne kemi letër”, i tha transmetuesit shtetëror ZDF, kreu i shoqatës tregtare për industrinë gjermane të letrës, Alexander von Reibnitz, duke shtuar se “industria gjermane e letrës është shumë produktive, ne mund të ofrojmë dhe dorëzojmë në kohën e duhur porosinë.”

Kryetarja e komisionit zgjedhor, Ruth Brand, tërhoqi vëmendjen gjatë fundjavës me komentet e saj për rrezikun e mbajtjes së zgjedhjeve të parakohshme për shkak të pamjaftueshmërisë së kohës për t’u përgatitur.

Ndër frikërat e saj ishin se organizimi zgjedhor mund të përplasej me festimet e Krishtlindjeve, ose Pashkët, si dhe sezonin popullor të karnavaleve, kur festat e rrugës dominojnë kalendarin në veçanti në Gjermaninë perëndimore.

Bisedat për zgjedhje të parakohshme u ndezën javën e kaluar kur kancelari, Olaf Scholz, shkarkoi ministrin e tij të Financave në një grindje të gjatë rreth uljes së borxhit. Ka plane për një votëbesim në Bundestag, të cilin qeveria e tij ndoshta do ta humbiste, duke i hapur rrugën zgjedhjeve të reja që do të mbahen në çdo kohë midis janarit dhe mesit të prillit.

Rënia e qeverisë ndodhi pikërisht në kohën kur Berlini po përtypte lajmin që nga ai mëngjes se Donald Trump kishte fituar zgjedhjet presidenciale në SHBA.

Brand paralajmëroi për “rreziqe të paparashikueshme në të gjitha nivelet, veçanërisht në nivelin komunal” nëse zgjedhjet do të thirreshin brenda pak kohësh. Ajo u kërkoi vendimmarrësve që t’i shmangen Krishtlindjeve dhe Vitit të Ri, duke thënë se askush nuk do të ishte në disponim për fushatë zgjedhore ose për të dëgjuar ofertat zgjedhore të politikanëve në atë kohë.

Ajo iu referua gjithashtu shqetësimeve të saj se “mund të mos ketë mjaftueshëm letër në dispozicion për të qenë në gjendje të printohen të gjitha dokumentet” kaq shpejt, veçanërisht fletët e votimit për më shumë se 60 milionë njerëz me të drejtë vote.

Deklaratat u pasuan me batuta nga e gjithë Evropa, me Poloninë fqinje që ofronte me gëzim t’i vinte në ndihmë Berlinit.

“Nëse Gjermania ka nevojë për printera dhe letër, ne do të jemi në gjendje t’ua shesim të dyja fqinjëve tanë dhe kompanitë polake do të jenë të lumtura të përfitojnë nga kjo dhe të rrisin PBB-në e vendit”, tha Dariusz Joński, një eurodeputet për Koalicionin Qytetar të qendrës së majtë.

Partia opozitare e djathtë Ligj dhe Drejtësi i kërkoi Donald Tusk, kryeministrit polak, “të vijë në ndihmë miqve të tij gjermanë”.

Gjermania është prodhuesi kryesor i letrës në BE, duke prodhuar pothuajse 13 milion metra kub në 2022. Polonia është e shtata më e madhe, me një prodhim vjetor prej rreth 3.5 milion metra kub.
Burimi