Donald Trump bën shaka me praninë ‘e vazhdueshme’ të Musk-ut në Mar-a-Lago: ‘S’më hiqet qafe’

Në fjalimin e tij të parë të madh që nga fitorja në Shtëpinë e Bardhë javën e kaluar, Trump foli në galanë e Institutit të Politikës “America First” në Palm Beach, Florida, të enjten në mbrëmje, dhe tha me shaka se miliarderi i teknologjisë “thjesht e pëlqen këtë vend.”

“Elon, çfarë pune, çfarë pune që bën ai,” tha Trump, duke e lavdëruar. “Ai është i shkëlqyer, është një djalë shumë i mirë. Atij i pëlqen ky vend. S’e heq dot qafe.”

Musk, të cilit i është dhënë një rol për të vlerësuar efikasitetet qeveritare për Trump-in, doli në skenë menjëherë pas Presidentit të zgjedhur.

“Siç tha Presidenti Trump, ajo që na nevojitet është logjika e shëndoshë,” u tha Musk pjesëmarrësve. “Ky nuk do të jetë biznes si zakonisht. Ky do të jetë një revolucion.”

Raportet tregojnë se Musk ka kaluar “gati çdo ditë” me Trump-in në pronën e tij në Florida, Mar-a-Lago. Ai madje iu bashkua Trump-it në një lojë golfi me mbesën e tij, Kai, 17-vjeçare. Miliarderi gjithashtu ka marrë pjesë në telefonatat me liderë botërorë, përfshirë diskutimin e Trump-it me presidentin ukrainas Volodymyr Zelensky.

Musk ishte gjithashtu i gjithëpranishëm në fushatën zgjedhore. Miliarderi themeloi pro-Trump America PAC dhe madje nisi një lotari të përditshme muajin e kaluar që shpërblente me 1 milion dollarë njerëzit që nënshkruanin një peticion që mbështeste të Drejtat e Amendamentit të Parë dhe të Dytë.

Trump bëri pothuajse të njëjtën shaka në një takim të Republikanëve të Dhomës të mërkurën: “Elon nuk do të shkojë në shtëpi. S’e heq dot qafe, të paktën deri kur të mos më pëlqejë.”

Gazetarja veterane e teknologjisë, Kara Swisher, i tha CNN-it të dielën në mëngjes se njerëzit pranë Trump-it ishin të hutuar dhe të shqetësuar nga shkalla e ndikimit të Musk-ut.

“Ai përfshihet gjithë kohën; ky është stili i tij. Kjo është arsyeja pse ai thjesht është shfaqur papritur atje si një mysafir që nuk dëshiron të largohet,” tha ajo.

Trump caktoi Musk-un, së bashku me ish-kandidatin presidencial të Partisë Republikane, Vivek Ramaswamy, për të drejtuar Departamentin e sapokrijuar të Efikasitetit Qeveritar.

Agjencia e re – e cila do të operojë “jashtë qeverisë” – do të këshillojë për shpërbërjen e departamenteve federale dhe se cili personel duhet të shkarkohet nëse konsiderohet se janë një “shpenzim i madh i panevojshëm.”

Trump premtoi se Musk dhe Ramaswamy “do të hapin rrugën për Administratën time për të çmontuar burokracinë qeveritare, për të reduktuar rregulloret e tepërta, për të shkurtuar shpenzimet e panevojshme dhe për të ristrukturuar agjencitë federale.” / Independent – Syri.net
Burimi