Operacioni i SPAK, si Pajtime Fetahu dhe Dedan Gjoni ndihmonin organizatën e Suel Çelës me informacione

SPAK ka dalë një njoftim zyrtar lidhur me aksionin e zhvilluar në Elbasan kundër grupeve kriminale. SPAK ka zbërthyer skemën se si funksiononte grupi kriminal, ndërsa në pranga janë vënë të paktën 18 person.
Lidhur me këtë aksion Struktura e Posaçme ka zbuluar rolin e përfshirë personave  të tjerë, duke nënvizuar se organizata kishte arritur të korruptonte funksionarë të policisë së Shtetit. Këta të fundit Dedan Gjoni si edhe Pajtime Fetahu kanë ofruar lehtësira dhe ndikime në sistemin gjyqësor në këmbim të përfitimeve materiale.
“Organizata kishte arritur të korruptonte funksionarë të policisë së shtetit (D.GJ.) dhe të sistemit gjyqësor (P.F.) të cilët duke shfrytëzuar pozicionin e tyre zyrtar e ndihmonin organizatën me informacione, duke ofruar gjithashtu lehtësira dhe ndikime në sistemin gjyqësor në këmbim të favoreve dhe përfitimeve materiale. Organizata kriminale kishte aftësi që të ndikonte dhe të korruptonte përfaqësues të sistemit të drejtësisë me qëllim që këta të fundit të lehtësonin pozitën e drejtuesit S.Ç. dhe anëtarëve të tjerë të organizatës në proceset penale në ngarkim të tyre. Për t’u theksuar është aftësia e organizatës që të ndikojë tek trupa gjyqësore me qëllim që të rëndohej pozita apo masa e dënimit që do te jepej në ngarkim të anëtarëve të grupit kriminal që konsideroheshin si kundërshtarë të tyre. M.L ka synuar të manipulojë perceptimin publik, duke i paraqitur rivalët e tij si të paprekshëm për shkak të lidhjeve të dyshuara që ata mund të kenë me politikën. Trysnia për hetime pasurore në kuadër të OFL-së dhe nxitja e mediave për të marrë dëshmi nga individë që mund të inkriminojnë rivalët e tij do të krijonin, sipas tij, në opinionin publik perceptimin se këta rivalë, për shkak të lidhjeve të dyshuara politike, janë bërë “të paprekshëm”. Kjo strategji, e cila përfshin manipulimin e informacionit dhe ndikimin në opinionin publik, jo vetëm që do të rriste pozitat e tij, dhe në të njëjtën kohë do të dëmtonte interesat e rivalëve. Dyshohet se këto synime i ka realizuar përmes bashkëpunimit me gazetarët A.H. dhe E.Q, të cilët kundrejt përfitimeve monetare të paligjshme kanë mbajtur qëndrime në media, si dhe kanë publikuar artikuj dhe video që keq informonin dhe manipulonin opinionin publik”, sqaron SPAK.
Burimi