Mbylli sot sytë përgjithmonë, Ismail Kadare u gjet i pajetë nga familjarët; njoftuan ambulancën, por ishte vonë

Ismail Kadare

Mëngjesin e sotëm është shuar kolosi i letrave shqipe, i madhi Ismail Kadare. Shkrimtari është gjetur i pajetë nga familjarët e tij në orët e para të kësaj të hëne. 
Ata kanë thirrur ambulancën, por ka qenë tepër vonë. Kadare ka ndërruar jetë për shkaqe natyrale në moshën 88-vjeçare.
Ai lindi në Gjirokastër, më 28 janar të vitit 1936. Ishte akademik, politikan, ish-deputet i Kuvendit Popullor (1970-’82), zv/kryetar i Frontit Demokratik dhe një ndër shkrimtarët më të mëdhenj bashkëkohorë.
Si shkrimtar u shqua kryesisht për prozë, por kontributi i tij u shtri edhe në dramaturgji, poezi dhe përkthime. Nisi të shkruajë kur ishte ende i ri, fillimisht poezi, me të cilat u bë i njohur, e më pas edhe prozë, duke u bërë prozatori kryesor shqiptar. Veprat e tij janë përkthyer në rreth 45 gjuhë të ndryshme, duke qenë kështu përfaqësues kryesor i letërsisë shqipe nëpër botë.
Në vitin 1996, Kadare u bë anëtar i përhershëm i Akademisë së Shkencave Morale dhe Politike në Francë. Është nderuar me shumë çmime ndërkombëtare, mes të cilëve Çmimin “Man Booker International” më 2005, çmimin “Princ i Asturias” për Artet më 2009 dhe Çmimin “Jeruzalem” më 2015. Viteve të fundit, ai e ndante kohën e tij mes Francës dhe Shqipërisë.

 ismail kadare
Burimi