Beogradi “tradhton” BE-në, aleati i Vuçiçit kërkon anëtarësim të Serbisë në BRICS!

Zëvendëskryeministri serb, Aleksandar Vulin deklaroi në një intervistë për mediat ruse se Serbia duhet të zgjedhë BRICS (aleancën e drejtuar nga Rusia dhe Kina), në vend të BE-së.
Serbia aplikoi për anëtarësim në BE në vitin 2009 dhe ka qenë kandidate që nga viti 2012, por blloku ka kërkuar njohjen e Kosovës si kusht për anëtarësim.
“BRICS nuk kërkon asgjë nga Serbia dhe ofron më shumë nga sa mund të dëshironim. BE-ja kërkon nga ne gjithçka dhe unë nuk jam më i sigurt se çfarë ka për të ofruar. Ne e shohim BRICS si një mundësi dhe një alternativë. Serbia është duke hetuar shumë nga afër të gjitha mundësitë e paraqitura nga BRICS dhe bashkëpunimin më të ngushtë me shtetet e saj anëtare”, tha Vulin për RIA Novosti të hënën.
Sipas Vulin, Serbia pret një ftesë zyrtare për samitin e BRICS, të planifikuar për në fund të tetorit në Kazan të Rusisë. Pavarësisht presionit të madh nga Brukseli, Beogradi nuk i është bashkuar embargos së SHBA-së dhe BE-së kundër Moskës, duke u zotuar zyrtarisht për neutralitet në konfliktin e Ukrainës dhe duke ruajtur marrëdhëniet tregtare me Rusinë dhe Perëndimin.
Sipas Vulin, kjo e ka vënë presidentin serb Aleksandar Vuçiç në rrezik të “revolucionit me ngjyra” dhe madje edhe të vrasjes.
“Diçka u ndodh të gjithëve që bëjnë thirrje për një zgjidhje paqësore për Ukrainën, ndaj ata qëllohen”, tha Vulin, duke vënë në dukje tentativën për vrasjen e kryeministrit sllovak Robert Fico dhe ish-presidentit të SHBA-së, Donald Trump.
Vulin shtoi më tej se Serbia dëshiron paqe dhe nuk pajtohet me ata anëtarë të BE-së dhe NATO-s që kërkojnë të arrijnë objektivin e pamundur për të mposhtur Rusinë me një luftë prokure.
“Paqja në Ukrainë mund të ishte arritur në Stamboll. Por kjo nuk ndodhi sepse ata që marrin vendimet për paqen në Ukrainë nuk janë nga Ukraina dhe dëshirojnë të luftojnë Rusinë deri në ukrainasin e fundit”, tha Vulin, duke iu referuar bisedimeve të ndërmjetësuara nga Turqia midis Moskës dhe Kievit.
Burimi