Atentat me eksploziv? Shtohet misteri për vdekjen e biznesmenit në Sarandë, angazhohen palombarët për gjetjen e provave

Një grup polumbarësh të forcave RENEA kanë mbërritur prej së mërkurës në Sarandë për të kërkuar prova të mundshme në vendin e shpërthimit pranë Portit të Sarandës që shkaktoi vdekjen e biznesmenit 52 vjeçar Armand Nelaj.
Burime konfidenciale për “ABC News” bëjnë të ditur se është shumë e vështirë gjetja e provave në atë pjesë të Gjirit të Sarandës, pasi për shkak se ndodhet afër Portit Detar, thellësia është shumë e madhe për të mundësuar ankorimin e lirshëm të anijeve.
Nga ana tjetër, policia e Sarandës ka kryer disa kontrolle ambientesh për të grumbulluar prova lidhur me ngjarjen e rëndë por burimet tregohen të rezervuara për rezultatet.
Grupi hetimor i drejtuar nga Prokuroria e Sarandës ka sekuestruar edhe një numër të madh kamerash sigurie të cilat po këqyren, duke përfshirë kamerat e Portit të Sarandës, të cilat janë të një cilësie të lartë për shkak të rëndësisë së veçantë dhe sigurisë së institucionit.
Një nga pistat për të cilën po hetohet intensivisht është se dyshohet që shpërthimi të ketë ndodhur nga një sasi eksplozivi, gjë që ka shkaktuar edhe vdekjen e biznesmenit 52-vjeçar, prind i dy fëmijëve.
Hetimet për këtë ngjarje që tronditi qytetin në orën 22.00 të datës 24 qershor vijojnë, madje sipas burimeve janë intensive. Ndërkohë që priten edhe analizat nga mjekësia ligjore.
Burimi