Zelensky i ofron Trump partneritet në prodhimin e mineraleve, duke kërkuar siguri

Presidenti ukrainas, Volodymyr Zelensky shqyrtoi hartën e klasifikuar të depozitave të mëdha të tokave të rralla dhe mineraleve të tjera të rëndësishme – pas propozimit të Donald Trump për një marrëveshje, sipas “Reuters”.
Presidenti amerikan, administrata e të cilit po bën presion për t’i dhënë fund shpejt luftës së Ukrainës me Rusinë, tha të hënën se donte që Ukraina të furnizonte SHBA-në me toka të rralla dhe minerale të tjera në këmbim të mbështetjes financiare për përpjekjet e saj të luftës.

“Nëse po flasim për një marrëveshje, atëherë le të bëjmë një marrëveshje”, tha Zelensky, duke theksuar nevojën e Ukrainës për të garantuar siguri nga aleatët e saj – si pjesë e çdo zgjidhjeje.
Ukraina hodhi idenë e hapjes së burimeve te mineraleve të saj të rëndësishme në këmbim të investimeve të aleatëve vjeshtën e kaluar, pasi paraqiti “planin e fitores” që kërkonte ta vendoste Kievin në pozicionin më të fortë për bisedime dhe ta detyronte Moskën të merrte pjesë në tryezën e bisedimeve.
Zelensky tha se më pak se 20% e burimeve minerale të Ukrainës, duke përfshirë rreth gjysmën e depozitave të saj të tokës së rrallë, ishin nën pushtimin rus.
“Tokat e rralla janë të rëndësishme në prodhimin e magneteve me performancë të lartë, motorëve elektrikë dhe elektronikës së konsumit”, tha ai.
Zelensky tha se Moska mund t’i hapë ato burime për aleatët e saj – Korenë e Veriut dhe Iranin – të dy armiq të betuar të SHBA-së.
“Ne duhet të ndalojmë Putinin dhe të mbrojmë atë që kemi – një rajon shumë të pasur Dnipron, në Ukrainën qendrore”, tha ai.
Trupat ruse kanë fituar terren në lindje prej disa muajsh, ndërkohë që forcat e Kievit po përballen me mungesën e ushtarëve dhe janë të shqetësuara për furnizimet e ardhshme të armëve nga jashtë.
Zelenskiy shpalosi një hartë në një tavolinë në zyrën e tij në Kiev, duke treguar depozita të shumta minerale, duke përfshirë një rrip të gjerë toke në lindje – e cila përmbante toka të rralla.
Ai tha se Ukraina kishte rezervat më të mëdha të titanit në Evropë, thelbësore për industrinë e aviacionit dhe hapësirës, ​​dhe uraniumit, të përdorur për energjinë bërthamore dhe armët.
Ukraina ka rikthyer me shpejtësi qasjen e saj të politikës së jashtme për t’u përafruar me botëkuptimin transaksional të vendosur nga presidenti i ri i Shtëpisë së Bardhë, aleati më i rëndësishëm i Ukrainës.
Por, Zelenskiy theksoi se Kievi nuk po propozonte “dhënien” e burimeve të tij, por po ofronte një partneritet reciprokisht të dobishëm për t’i zhvilluar ato së bashku.
“Amerikanët ndihmuan më së shumti, dhe për këtë arsye amerikanët duhet të fitojnë më shumë. Dhe ata duhet ta kenë këtë prioritet, dhe do ta kenë. Unë gjithashtu do të doja të flisja për këtë me presidentin Trump”, tha Zelensky.
Ai tha se Rusia e dinte në detaje se ku ishin burimet e rëndësishme të Ukrainës nga sondazhet gjeologjike të epokës sovjetike që ishin kthyer në Moskë kur Kievi fitoi pavarësinë në 1991. //a.i/ ATSH
Burimi