PD: Kullat në Tiranë për interesa okulte të Ramës, fitimi 90 milionë euro duke ndërtuar në tokë shtet

Plani për të zhvendosur administratën në kulla, sipas opozitës, është okult dhe bëhet për përfitime të ngushta të kryeministrit Edi Rama.
Kryeqeveritari Edi Rama njoftoi një ditë më parë planin për ndërtimin e katër kullave në kryeqytet, në tokë shtet. Qëllimi, sipas tij, ishte përdorimi i godinave të reja si zyra për administratën.
Ndërtimet, Rama i justifikoi duke u shprehur se aktualisht disa institucione publike kanë një kosto prej miliona Euro qira vjetore.
Përmes pamjeve në “FB” e tij një ditë më parë, u prezantuan 10 projekte për dy kullat e para. Projekti që u shpall fitues parashikon ndërtime në zonën e Komunës së Parisit, ku aktualisht ndodhet Drejtoria e Shërbimeve Qeveritare. Projekti i dytë fitues do të ndërtohet në ambientet ku sot është godina ekzistuese e Agjencisë Shtetërore e Kadastrës. Përveç zyrave, planet parashikojnë zona bankare, hapësira tregtare, zyra për qira dhe parkime nëntokësore.
Një ditë pas prezantimit të projekteve dhe shpalljes së fituesve, reagoi Partia Demokratike. Anëtari i kryesisë së PD-së, Grigels Muçollari tha se konkursi që Rama zhvilloi dje në kryeministri ishte “një shfaqje për të mbuluar planin e tij të vërtetë, që është ndarja e trojeve dhe pasurive shtetërore me miqtë e tij ndërtues, aty ku do të ngrihen kulla me vlerë të paktën 90 milionë euro në këtë fazë të parë”.
Sipas tij, pas emërtimit ‘energjizimi i qytetit’, fshihet një plan biznesi për të fituar të paktën 50 milionë euro me kullat tek ATSH dhe 40 milionë euro tek Inxhinieria e Ndërtimit.
“Edhe motivi se dhënia e këtyre trojeve në vendet më të shtrenjta të Tiranës, vjen në këmbim të ndërtimit të zyrave për qeverinë, është një justifikim i dobët. Ne kemi një qeverisje të keqe, jo se zyrat nuk janë në gjendje të mirë, por sepse ato janë të zhytura në korrupsion, në çdo nivel të ekzekutivit. Trojet më të lakmuara të Tiranës futen në një procedure me negocim, pra pa transparence, pa tenderim. Bëhet fjalë për 130 mijë metra katrorë ndërtim, ku shteti, merr më pak se 35 përqind, kur në këto zona, sipas tregut, pronari i tokës përfiton të paktën 45 përqind. Në këtë proces ku Edi Rama sillet si pronar i trojeve e godinave shtetërore, nuk gjendet dot interesi dhe përfitimi i publikut. Përfituesi i madh është ndërtuesi, i cili dihet se është i paracaktuar, mik dhe klient personal i Edi Ramës”, shtoi ai.
“Në klastrin e parë, ai që do të marrë ATSH për të bërë grataçelë, llogaritet që me çmimet e tregut do të fitojë rreth 50 milionë euro. Ai që do të bëjë kullë dhjetëra katëshe pranë inxhinierisë, do të fitojë mbi 40 milionë euro. E gjitha, një mundësi e mirë pasurimi për miqtë e Edi Ramës dhe një lavatriçe e re e pastrimit të parave në Tiranë. Një mënyrë për të bërë para me dhe për ata që kanë vjedhur zgjedhjet dhe për ta mbajtur pushtetin me zgjedhje te vjedhura. Një aferë më shumë korrupsioni e abuzimi me pushtetin e Edi Ramës në fund të mandatit të tij. Rezultati është po i njëjtë qytetarët, të cilët nuk blejnë më dot shtëpi në kryeqytet për shkak se çmimet nuk i cakton bursa e ndërtimit, por e ajo parave te pista dhe narko-qeverisë”, përfundoi.
Burimi