Kënga Magjike 2024, Ardit Gjebrea ka një rrëfim që nuk duhet humbur për Matildën dhe Selin

Nga Ardit Gjebrea
… e pashë në sfilatën e Joni Peçit, i cili më tregoi se shumica e modeleve ishin nga bota. Po ndiqja provat dhe ajo po bëhej gati të sfilonte. Në momentin e parë mendova se ishte italiane, pastaj nordike, apo ndoshta franceze…
Më përshëndeti në shqip, gjithë sharm, pastaj filloi parada. Ishte ajo që binte më shumë në sy, ndoshta ajo mbrëmje i kishte zbritur yllin nga qielli.
Afrohem pas provave në grupin e vajzave që po qëndronte dhe filloj ta pyes për emrin, profesionin, jetën, familjen. Quhej Matilda, gazetare dhe modele. Futem në Google, në YouTube dhe më impresionoi me intervistat nëpër programe të ndryshme. (Më duhet të pranoj që shoh shumë pak TV)
Të nesërmen Ishte sfilata dhe i them Anilës: “Shihe pak një vajzë bionde me flokë të shkurtra dhe më thuaj si të duket.” Pas sfilatës, Anila më tha: “Për Këngën Magjike? Po!” U vendos! Matilda Mcini në Kënga Magjike 2024!
Ajo është vajza që e kam rritur vetë, balerina e talentuar, pa fjalë, vetëm e buzëqeshur dhe e edukuar. Figura e saj rritej në sytë e mi çdo herë, nga dedikimi dhe korrektesa në punë. Së fundi e angazhova në disa xhirime prezantimi pushimesh verore dhe më impresionoi lirshmëria dhe memorizimi i materialit.
Më kërkojnë një mendim për një valetë në një program televiziv ku do ishte një prezantuese tjetër figura qendrore. Pa mëdyshje propozoj: Selin!
Ajo shkon në takim, por… nuk aprovohet! E kuptova pse… në fakt, ajo që kisha propozuar nuk ishte ajo që meritonte Selin, pasi mësova detaje për rolin e saj në program.
Vjen dhe me një buzëqeshje të trishtuar më thotë: “Nuk më morën!” Aty vendosa me veten, ajo meriton më shumë: Selin Bollati në Kënga Magjike 2024!
Takoj fillimisht Selin dhe i jap lajmin… sytë e saj u mbushën! “Ka qënë ëndrra ime” – më thotë dhe vijoi: “Teksa sillja kupat e artistëve në skenën e Këngës Magjike në netët Finale (gjë që e ka bërë për disa vite rresht) mendoja dhe ëndërroja që të isha unë një ditë në vendin e prezantueseve, dhe Zoti po më plotëson një dëshirë!”
Takoj Matildën, kishin kaluar 4 muaj nga sfilata. – “Je prezantuese e festivalit Magjik 2024” – i them. Sytë e saj të mëdhenj e të bukur u zmadhuan dhe u skuqën nga lotët. “Më picko” më thotë, “Më duket se jam në ëndërr, por mos më zgjo”.
Të plotësosh ëndrra është fantastike, kujt meriton, duhet t’ ja japësh një shans, por janë ëndrra që vijnë pas një pune të gjatë dhe investimi për t’i merituar.
Tani fillon puna!
Në datën 4 Dhjetor – Nata e Parë Gjysëmfinale me Matildën!Në datën 5 Dhjetor – Nata e Dytë Gjysëmfinale me Selin.Në datën 7 Dhjetor – Nata Finale me Matildën dhe Selin.
 
Burimi