Policia në Budapest ka ndaluar zyrtarisht një aktivitet pro-LGBTQ+ të planifikuar për më 28 qershor, në kuadër të masave të reja të ndërmarra nga qeveria e djathtë e Hungarisë për të ndaluar paradën tradicionale Budapest Pride. Vendimi vjen pas miratimit në mars të një ligji që i jep qeverisë kompetenca për të ndaluar eventet publike të komuniteteve LGBTQ+, i pasuar në prill nga një ndryshim kushtetues që ndalon aktivitete të tilla.
Në deklaratën e saj, Policia e Budapestit argumentoi se “nuk mund të përjashtohet, madje është e pashmangshme, që një person nën moshën 18 vjeç të përfshihet në sjellje të ndaluara me ligj” nëse merr pjesë në marshimin e propozuar. Gjithashtu, policia pretendoi se ngjarja mund të ketë “viktima pasive”, persona që ndonëse nuk dëshironin të merrnin pjesë, do të ekspozoheshin në mënyrë të pavullnetshme për shkak të karakterit publik të marshimit.
Organizatorët reaguan ashpër duke e cilësuar vendimin si “një shembull klasik i tiranisë”. Sipas zëdhënësit të Amnesty International, Áron Demeter, i cili është edhe një nga organizatorët e marshimit, “policia nuk ndaloi Pride-in, por paradën me ngjyrat e ylberit, që më parë ishte e lejuar – një absurditet ligjor.”
Ligji i shumëpërfolur për “mbrojtjen e fëmijëve” në Hungari ndalon çdo “shfaqje ose promovim” të homoseksualitetit ndaj personave nën 18 vjeç. Qeveria ka deklaruar se këto masa synojnë të mbrojnë të drejtat morale, fizike dhe shpirtërore të fëmijëve. Sipas rregullave të reja, organizatorët dhe pjesëmarrësit në evente si Pride mund të përballen me gjoba dhe identifikim përmes teknologjisë së njohjes së fytyrës.
Kryeministri Viktor Orbán, në një fjalim në shkurt, i këshilloi organizatorët që “të mos lodhen duke organizuar paradën e këtij viti”, duke e quajtur “humbje kohe dhe parash”.
Ndërkohë, autoritetet hungareze kanë dhënë deklarata kontradiktore nëse këto politika përbëjnë ndalim të plotë të Budapest Pride. Policia përfshiu në njoftimin e saj fotografi dhe video nga paradat e mëparshme si “prova” që sugjerojnë shkelje të ligjeve të reja.
Mbi 20 vende të Bashkimit Europian, përfshirë Francën, Gjermaninë dhe Spanjën, u bënë thirrje autoriteteve hungareze muajin e kaluar që të rishikojnë ligjin, duke shprehur shqetësim se ai bie ndesh me vlerat themelore të BE-së për dinjitetin njerëzor, lirinë, barazinë dhe respektin për të drejtat e njeriut.
Organizatorët e Budapest Pride, që këtë vit shënon 30-vjetorin dhe tërheq mijëra pjesëmarrës çdo vit, kanë deklaruar se ngjarja do të mbahet pavarësisht kërcënimeve me sanksione ligjore.