Emri i Avokatit të Popullit ka vite që nuk votohet në parlament, sepse palët politike nuk binin dakort për emrin. Ndërkohë ka pak muaj që ka dalë emri i Besim Ndregjonit, si nga PD, ashtu dhe nga PS. Emri i tij ndodhet në tavolinat e deputetëve të parlamentit dhe do të ishtë në nderin e këtyre deputetëve aktualë që ta miratojnë atë si Avokat i Popullit.
Besim Ndregjoni është aktivist i të Drejtave dhe Lirive të Njeriut. Ai për kontributet e tij qytetare është nderuar edhe me titullin “Qytetar Nderi” i Qarkut të Tiranës.
Por ka edhe nderime për këtë figurë antikomuniste, që ka vuajtur ngqa sistemi komunist si person dhe si familje. Ai e di më mirë se kushdo se çdo të thotë liria dhe të drejtat e njeriut.
Besim Ndregjoni ka lindur më 16.02.1953, në Dibër dhe aktualisht banon në Tiranë. Eshtë i martuar dhe baba i 4 fëmijëve. Në vitin 1984 mbaroi shkollën e mesme pa shkëputje nga puna. Lejohet mbas 12 vitesh të arsimohet si i deklasuar nga regjimi. Në vitin 1992 studion në Fakultetin Juridik të Universitetit Shtetëror të Tiranës dhe në vitin 2007 – 2010 kryen në Universitetin Jopublik “Kristal”, studimet për Mastër, si Jurist. Në lidhje me aktivitetin e tij të mëtejshëm flasin dekoratat dhe medaljet e dhëna nga drejtuesit më të lartë të politikës shqiptare, si edhe vlerësimet e shumta në shkallë ndërkombëtare.
Besim Ndregjoni vjen nga një familje fisnike, e shquar në kontributet për shërbimet në drejtim të shoqërisë dhe kombit. Si familje fisnike u persekutua nga regjimi komunist. Ai regjim i pushkatoi tre pjesëtarë të familjes, ndërsa dy të tjerë i mbyti në hetuesi. Babain e tij, Imer Ndregjoni e dënoi me 17 vjet burg politik dhe persekutimi vazhdoi edhe jashtë familjes ku nga torturat i çmenden në hetuesi kunatin (1982). Gjatë Luftës së Dytë Botërore babai i tij luftoi me armë në dorë së bashku me Abaz Kupin kundra fashizmit në prill të vitit 1939. Ai ishte një nacionalist, antikomunist dhe humanist, i cili gjatë periudhës 1943-1945 shpëtoi një familje hebrejsh nga genocidi nazist.
Me ardhjen e sistemit pluralist për kontributet e dhëna në shërbim të kombit, babai i tij` është shpallur “Qytetar Nderi i Dibrës” (2003). Presidenti i Republikës Alfred Mosiu e ka dekoruar me “Medaljen e Artë të Shqiponjës” si luftëtar antifashist dhe antikomunist (2004). Këshilli Bashkiak i Tiranës me rastin e 60 vjetorit të genocidit nazist mbi Hebrejtë, ka emërtuar një Rrugë në Tiranë “Rruga Imer Ndregjoni” me motivacionin për shpëtimin që u bëri hebrejve gjatë okupacionit nazist.
Gjate viteve te pluralizmit, Besim Ndregjoni ka dhënë një kontribut të çmuar për dokumentimin, publikimin dhe memorien historike të krimeve të komunizmit. Ai njihet si mbrojtjës i zjarrtë i kauzës së të përndjekurve politikë, duke qenë një oponent i vazhdueshëm ndaj pushtetit politik për integrimin dhe rehabilitim e pasojave dhe traumave të kësaj pjese të shoqërisë shqiptare.
Por Besim Ndregjoni njihet si mbrojtës i të drejtave qytetare të çdo njeriu në Shqipëri. Ai është pritur nga papa Francesku në Vatikan, si personalitet shqiptar.
Ndaj parlamenti do t’i bënte një nder vetvetes që ta votonte si Avokat i Popullit.
