Franca dhe Gjermania përplasen për “blerjen e armëve” nga BE-ja
Franca dhe Gjermania janë në mosmarrëveshje për një fond mbrojtës prej 150 miliardë eurosh që synon forcimin e prodhimit ushtarak të Evropës, raporton gazeta londineze Financial Times.
Sipas FT-së, kancelari gjerman Olaf Scholz mbështet hapjen e fondit për partnerët jashtë Bashkimit Evropian si Mbretëria e Bashkuar, Norvegjia, Zvicra dhe Turqia.
Ndërsa, presidenti francez Emmanuel Macron thotë nga ana tjetër se fondi duhet t’i japë përparësi armëve të prodhuara evropiane dhe kundërshton blerjen nga vendet jo anëtare të BE-së.
Komisioni Evropian propozoi javën e kaluar që të mblidheshin 150 miliardë euro, të cilat do t’u jepeshin hua kryeqyteteve për të rritur prodhimin e tyre ushtarak.
Gjatë një samiti të BE-së të enjten, disa liderë, përfshirë kancelarin gjerman Olaf Scholz, thanë se nisma duhet të jetë e hapur për partnerët jashtë BE-së.
“Për ne është shumë e rëndësishme që projektet që mund të mbështeten me këtë të jenë të hapura…vendet që nuk janë pjesë e Bashkimit Evropian, por që punojnë ngushtë së bashku, si Britania e Madhe, Norvegjia, Zvicra apo Turqia”, tha Scholz.
Megjithatë, presidenti francez Emmanuel Macron, i cili ka mbështetur prej kohësh rritjen e autonomisë evropiane dhe rritjen e prodhimit industrial vendas, tha se “shpenzimet nuk duhet të bëhen për komplet të ri të disponueshëm që është edhe një herë jo-evropian”.
Për boshllëqet në aftësitë kritike të Evropës – duke përfshirë mbrojtjen ajrore, sulmet me rreze të gjatë, inteligjencën, zbulimin dhe shënjestrimin – “metoda është të identifikojmë biznesmenët dhe bizneset më të mira që kemi”, shtoi ai.
Ai tha gjithashtu se çdo shteti anëtar të BE-së do t’i kërkohet të “rishqyrtojë urdhrat për të parë nëse urdhrat evropianë mund të kenë përparësi”.
Qeveria polake, e cila aktualisht mban presidencën e rradhës të BE-së dhe ka për detyrë të kryesojë takimet ministrore të bllokut, do të jetë nën presion për të arritur një marrëveshje të shpejtë.
“Ne jemi në një fazë ku kjo thjesht duhet të zgjidhet në emër të shpejtësisë, jo përsosmërisë”, tha një diplomat i BE-së i përfshirë në negociata. “Por nëse ka pasur ngurrim për të mbledhur 1.5 miliardë euro kundër kundërshtimeve franceze, si pritet të bëjmë 150 miliardë euro?” /Financial Times/
Burimi
