Vrasja e tregtarit Besnik Hida në Lushnjë, SPAK mbyll hetimet dhe dërgon dosjen për gjykim

SPAK përfundon hetimet për vrasjen e tregtarit Besnik Hida, ngjarje e regjistruar në vitin 2019 në Lushnje. Prokuroria e Posaçme ka kërkuar gjykimin e Ardjan Ahmetaj si bashkëpunëtor në vrasjen e 40-vjeçarit dhe pushimin e çështjes për Laert Haxhiun dhe Orgest Bilbilin për pamjaftueshmëri provash. Ahmetaj dyshohet se mori pjesë në vrasjen me kallashnikov të Besnik Hidës më 1 tetor të vitit 2019, në kohën kur ai po konsumonte kafe në lagjen “Skënder Libohova” në qytetin e Lushnjës. 40-vjeçari u ekzekutua nga dy persona të cilët nuk janë identifikuar ende nga Prokuroria e Posaçme për shkak se kanë qenë me maska, ndërsa Ardjan Ahmetaj ka pasur rolin e ndihmësit.