Tag: galli

Gjatë prezantimit të memorialit “Niccolò Galli”, ku mori çmimin e karrierës, Alessandro Del Piero foli për kuadrin e turneut dhe jo vetëm: “Firenze është një qytet i mrekullueshëm, por kur mbërrita pashë legjendat fiorentine këtu (Antognoni dhe Galli)”.
Goli yt më i bukur mbetet ai me thembër ndaj Fiorentinës…Për idenë dhe mënyrën si ndodhi, po. Ishte një gol shumë i çuditshëm, ishin kohë të bukura kur Fiorentina dhe Juve luftonin për objektiva të rëndësishëm.
Në Firence nuk ka pasur kurrë polemika të rënda ndaj teje…Po, ka pasur (qesh), por ka nga ata që i kanë pësuar më keq. Gjithmonë përpiqesh të japësh më të mirën për të mbrojtur ngjyrat e tua, pastaj ka shumë dinamika. Kur gabojmë, ne lojtarët marrim kartonë, ndërsa për tifozët situatat janë ndryshe. Ironia është e bukur, pastaj në futboll jemi gjenialë… Në rrjetet sociale ka gjëra argëtuese, por nuk duhet ta teprojmë, ndryshe gjithçka shihet në mënyrë negative, kur nuk duhet të jetë kështu.
Kanë humbur numrat 10 dhe 7 në futboll, çfarë ka ndodhur?Kam qenë pjesë e një brezi ku kishte 3 lojtarë të jashtëzakonshëm të huaj si Platini, Zico dhe Maradona, por edhe të tjerë si Antognoni, që ndriçonin. Futbolli më pas u modernizua në epokën time dhe ndryshoi. Flitet për fizikalitet, por për mua ndryshimi më thelbësor ka qenë rregullorja, e cila i ka hutuar arbitrat dhe lojtarët. Tani është një sport tjetër; për sulmuesit është më e lehtë, për mbrojtësit më e vështirë, për portierët edhe më keq. Futbolli është zhvilluar, kundërshtari të studion dhe vëzhgon më shumë, teknologjia ka një rol të madh. Tani shohim dhe gjykojmë gjithçka, ka shumë dinamika të tjera. Pastaj sektorët e të rinjve janë në një krizë të thellë. Në Itali e themi, por më pas largohemi dhe gjithçka vazhdon normalisht. Këto gjëra duhet të shihen gjithnjë e më shumë me lupë, edhe sepse vende të tjera janë përgatitur më mirë se ne. Këtu të rinjtë nuk ndiqen si më parë.
Çfarë ndodhi me Juven në këto vite?Ka kaluar përmes ‘tërmeteve’ dhe ‘cunamëve’, shumë ndryshime, kështu që ndonjëherë është e vështirë për zgjedhjet, për atë që shfaqet në fushë, ose sepse të tjerët janë më të mirë. Ka klube që kanë arritur nivele shumë të larta. Kur bëhen vlerësime për kampionatin tonë dhe thuhet se Juventusi e Milani duhet të dalin të katërt, duhet të mendojmë që nuk është e lehtë as të arrish në Europë. Ka realitete si Atalanta dhe Bologna, sidomos Atalanta, që ka fituar ‘Europa League’, që 7-8 vite më parë askush nuk mendonte se mund t’i arrinin këto nivele.
Galli ndërhyn dhe pëshpërit: Ka edhe drejtues që dinë më pak për futbollin…Po, edhe kjo, por ka shumë kamera dhe mikrofona (qesh). Giovanni duhet të mendojë të kërcejë.
Çfarë mendon për garën e titullit në Serie A?Ishte e bukur deri në fund. Asnjëherë si këtë vit nuk kemi arritur në një fund ku luftohej njëkohësisht për kampionat, për Europë dhe mbijetesë, me kaq shumë skuadra të përfshira.
Çfarë mendon për Fiorentinën aktuale?Nuk është e lehtë të dalësh i katërti, por as i pesti, i gjashti apo i shtati. Në përgjithësi, nëse njeriu e shikon nga jashtë, skuadra vjollcë i ka bërë tifozët të ëndërrojnë. Ka ende shansin për Europën, arriti në finale të ‘Conference League’ vitin e kaluar dhe mbi të gjitha duhet vlerësuar shumë ajo që ka bërë Commisso këtu. Projektet drejtuese janë afatgjata, por të kesh ‘Viola Park’ dhe një stadium që më në fund do të jetë sipas standardeve europiane… Nuk janë gjëra të thjeshta. Ka pasur ndërrime në pankinë dhe jo gjithmonë gjërat shkojnë mirë, shikoni Juventusin dhe Milanin që kanë vuajtur shumë. Tifozët duan më shumë, u është hapur oreksi me këto finale, por sezoni është pozitiv.
Çfarë do t’i këshillonit Kean?Nuk besoj se jam personi që duhet t’i japë këshilla. Ka bërë një vit të jashtëzakonshëm, më të mirin në çdo aspekt. Mendoj se në kokën e tij është ideja për të qëndruar te Fiorentina.
Çfarë mendon për Fagioli?Ka talent të jashtëzakonshëm, ka kaluar ulje-ngritje nga më të ndryshmet. I uroj më të mirën edhe atij, qoftë në Firence apo diku tjetër. Të dy kanë treguar, sidomos te Juve, që është një ambient i veçantë, se respektojnë fanellën, shokët dhe bëjnë punë të shkëlqyer në fushë.
Futbolli duhet të ndihmojë…Kjo është e vërtetë. Folëm për kulturën, besoj se futbolli ka një jehonë të madhe, por duhet të integrohet në jetën e përditshme. Futbolli është vetë jeta, ky detaj na bën ndonjëherë të zhytemi më tepër se duhet te ky sport.